2016 MotoGP season tan a ni ta a, intlansiak hmasa ber Qatar GP-ah World Champion Jorge Lorenzo chu pakhatna niin point 25 nen season bul a tan.
Lorenzo chuan pole-ah dingin, Spanish rider pathum Lorenzo, Marquez leh Vinales te chuan tlar hma ber atangin bul an tan. An hnung chiahah Italian rider pathum Iannone, Rossi leh Dovizioso te an intlar bawk a.
Ducati rider pahnih Iannone leh Dovizioso te chuan bul an tan tha hle, Marquez erawh bul tan naah an pel nual a. Lap khatna an tlan zo vel chiah tihin Ducati rider pahnih an rawn dawk zawk, Ducati one-two kan hmu. Iannone chuan hma hruaiin, lap 17 a la awm tihin Andrea Dovizioso chuan Iannone a rawn pel a.
Hemi hnu lawk hian Iannone chu turn 13-ah a tlu a, a tawlh chhuak ta a ni. Ducati rider Andrea Dovizioso chuan hma a hruai rei lo, lap 14 a la awmin Lorenzo chuan a rawn pel a, Marquez leh Andrea Dovizioso te chuan pahnihna dinhmun an inchuh chho ngar ngar.
Lap 4 chiah a awm tawh tihin Marquez chuan Andrea Dovizioso a lehpel a, Rossi pawhin podium chan tumin pathumna dinhmun a rawn chuh ve ngar ngar bawk a. Final lap-ah Andrea Dovizioso chuan Marquez a lehpel leh a, an tlan zo tep tihin Marquez chuan a rawn pel leh, mahse last corner-ah Andrea Dovizioso a dingchang ta zawk a ni.
Tihbuai phak lohva tlan Lorenzo chu pakhatna niin, Andrea Dovizioso chu pahnihna a ni a, Marquez chu pathumna niin Yamaha tana 2017 leh 2018 thlenga contract ziak thar Valentino Rossi chuan Podium a chang ta lo a ni.
Lorenzo chuan soft tyre leh hard tyre a hmanpawlh chu a chungnunna niin a sawi a. Intlansiak zawhah rear soft tyre chu a fawp nghe nghe a ni. Kumin MotoGP season hi a hmuhnawm dawn hle niin a lang. Ducati bike an chak leh hle a, kawng ngilah an chak fua fua khawp mai, Iannone kha chesual ta lo selang chuan results a danglam nual ngei ang le. Kumin hian Factory Yamaha, Ducati leh Repsol Honda te an inel chho hle dawn niin a lang.
MotoGP QatarGP Results
1. Jorge LORENZO
2. Andrea DOVIZIOSO +2.019
3. Marc MARQUEZ +2.287
4. Valentino ROSSI +2.387
5. Dani PEDROSA +14.083
6. Maverick VIÑALES +15.423
7. Pol ESPARGARO +18.629
8. Bradley SMITH +18.652
9. Hector BARBERA +21.160
10. Scott REDDING +24.435
11. Aleix ESPARGARO +35.847
12. Eugene LAVERTY +41.756
13. Alvaro BAUTISTA +41.932
14. Jack MILLER +41.982
15. Tito RABAT +54.953
-Stefan BRADL +11 laps
-Loris BAZ +14 laps
-Cal CRUTCHLOW +16 laps
-Andrea IANNONE +17 laps
-Yonny HERNANDEZ +21 laps
Pictures credit : motogp.com