13 Sep 2020 07:37

inkhel

MotoGP: Misano-ah Morbidelli a chak ber

Franco Morbidelli chu Misano-ah pakhatna a ni a, 2020 MotoGP World Championship-ah rider chak ber ni thei pangana a ni a, MotoGP huanga chak ber a nih hmasak ber a ni.

Yamaha rider Franco Morbidelli hian pahnihna atangin bul a tan a, bul a tan fuh hle a. An tlan tan deuh chauh tihin Morbidelli chu hmahruaitu a ni nghal a, Valentino Rossi chu pahnihnaah a rawn awm a, pole position atanga bul tantu Maverick Vinales chu pathumnaah a awm thung a ni.

Valentino Rossi chuan Franco Morbidelli chu lehpelh a tum hle a, a tum angin a che thei mai lo thung a. Jack Miller pawh pathumnaah a rawn awm chho a, Vinales chu palinaah a tlahniam ve bawk a, Fabio Quartararo chu pangana a ni a.

Fabio Quartararo hi a chesual a, intlansiak a zawm leh meuh chuan 20-naah a awm daih tawh a. Quartararo hi a hnuah a tlu nawn leh a, a tlan chhunzawm ve ta lo a ni.

Lap 9 vel an tlan hnu chuan Morbidelli leh Rossi te chu an inhlat ve tial tial a, lap 14 an tlan hnuah phei chuan second 1 velin an inthlau tawh a. Lap 18 an tlan meuh chuan an inhlat zawng pawh second 2 a tling hman tawh a ni.

Miller chu pathumnaah a awm reng thei ta lo a, lap 14 velah Alex Rins chuan a rawn lehpel a. Joan Mir a rawn inlar ve leh bawk a, a teammate Rins chu a rawn lehpel thei a, a tawpah pathumna a ni thei hial a ni.

Francesco Bagnaia chu a tawpah pahnihna a ni thei a, MotoGP huanga a tel chinah podium a lawn hmasak ber a ni a. Franco Morbidelli leh Joan Mir te nen podium-ah hian an lawn a ni.

Valentino Rossi chu palina a ni a, Italian rider hian podium-a vawi 200 lawn a tum viau a, a thei ta rih lo a. Alex Rins chu pangana a ni a, Maverick Vinales chu parukna niin, a hnuai chiahah hian Andrea Dovizioso a awm a, Takaaki Nakagami chu pariatna a ni.

Result

1. Franco Morbidelli, Yamaha
2. Francesco Bagnaia, Ducati
3. Joan Mir, Suzuki
4. Valentino Rossi, Yamaha
5. Alex Rins, Suzuki
6. Maverick Viñales, Yamaha
7. Andrea Dovizioso, Ducati
8. Takaaki Nakagami, Honda
9. Jack Miller, Ducati
10. Pol Espargaro, KTM
11. Miguel Oliveira, KTM RC16
12. Brad Binder, KTM
13. Aleix Espargaro, Aprilia
14. Iker Lecuona, KTM
15. Johann Zarco, Ducati
16. Danilo Petrucci, Ducati
17. Alex Marquez, Honda
18. Stefan Bradl, Honda
19. Bradley Smith, Aprilia
DNF
Tito Rabat, Ducati
Fabio Quartararo, Yamaha