15 Nov 2019 12:31

bakteaJr.

Mizo tlangval

​MotoGP: Lorenzo a chawl dawn

MotoGP world champion vawi thum lai lo ni tawh Jorge Lorenzo chuan racing chawlhsan a tum tawh thu a sawia, tun season-a race hnuhnung ber zawhah a retire ve tawh dawn.

Tun season-ah race pakhat chiah a bang tawha, tun thla ni 17 hian tun season-a race hnuhung ber Valencian GP chu tlan a ni dawna, hemi zawh hian Lorenzo hi a chawl ve tawh dawn.

Kum 32 mi Respol Honda rider Lorenzo chuan chawlh a tum tawh thu sawiin, “Ka hun a lo thleng ve ta a, Valencian GP hi MotoGP-a ka race hnuhnung ber a ni dawna, hemi zawh hian professional racer ka nihna atangin ka retire tawh ang,” a ti.

Spaniard rider Lorenzo hi kum 2010, 2012 leh 2017 te khan Yamaha-a a awm laiin world champion a lo ni tawha, kum 2006 leh kum 2007 khan 250cc lamah pawh world champion a lo ni tawh.

MotoGP-ah kum 2008 atang khan Lorenzo hi a tlan tana, race 47-ah hnehna changin, hnehna chang ngun ber pangana a ni nghe nghe a, podium-ah vawi 114 ngawt a awm bawk a ni.

Kumin June thla khan Assen Grand Prix tana practice-naah Lorenzo hi a chesuala, na taka inhliamin Grand Prix pali ah a tel theih loh phaha, tunah hian Respol Honda-ah awm mekin kum khat daih contract la nei mahse retire mai a tum ta zawk a ni.