MotoGP lamah tun season-a race pathumna Czech Republic Grand Prix tlan a ni a, hetah hian KTM rider Brad Binder chu a chungnung ber.

South African rider Binder hi MotoGP-a race pathumna chauh ni mahse a chak nghala, Grand Prix-a a vawi khat chakna ni bawkin, a tan ni chhinchhiah tlak tak a ni.

Italian rider Franco Morbidelli chuan a tira hma a hruaia, Binder hian French rider Fabio Quartaroro lehpelin, pahnihnaah a awma, hemi hnu hian Yamaha rider Morbidelli a lehpel zui leh.

Binder chuan, “Vawiin ang hi ka naupanlai atanga ka lo suangtuah tawh thin a ni a, ka nu leh pate a hmunah hian awm ve ngei se ka ti hle a, a chhan chu anni hi a tir te atanga min thlawp tlat tu leh min nawr kal tu te an ni.

“Ka team hnenah hian lawmthu ka sawi seng lova, a chhan chu motorbike tha em em min khalh tir tu an ni a, chak thei kan ni tih pawh ka hre ngai lova, tunah chuan ka ngaih pawh a tha tawh hle, tun bak pawh hi a dang la awm belh zel turah ka beisei a ni,” a ti.

Morbidelli chu pahnihna niin a vawi khat nan podium-ah hmun a changa, Ducati rider Johann Zarco chu pathumnaah awmin, Suzuki lam Alex Rins chu palinaah a awma, MotoGP legend Valentino Rossi chu panganaah a awm ve bawk.

World champion Marc Marquez erawh Czech GP-ah hian a ban ruh tliak avangin a inlan thei lo.

MotoGP tlan leh tur hi Austrian GP a ni dawna, August thla ni 16 hian tlan tura ruahman a ni.

Czech GP results: