02 Mar 2020 07:23

bakteaJr.

Mizo tlangval

​MotoGP: Coronavirus avangin Qatar GP an thulh

MotoGP season tan a ni leh tep tawha, mahse season khuh hawnna tur Qatar Grand Prix chu tunlai coronavirus avangin thulh fel a ni.

Qatar GP hi tun thla ni 8-a tan tura tih ni mahse Italy lam atanga zin veivak tur an awm nual avangin thulh a ngai a, Italy hi tunah hian coronavirus avangin an buai hle a, Asia pawn lamah he virus darh nasat na ber niin, Italy atang hian Qatar-ah zin veivak te tan luh theih a ni lova, MotoGP hi cancel a ngaih phah.

Italy hi MotoGP-ah hian a pawimawhna chhan chu MotoGP-a rider paruk te hi Italian a nih bakah team eng emaw zat hi Italy rama innghat an ni a, hei vang hian loh theih lovin season khuh hawnna tur Grand Prix hi an thulh ta a ni.

Moto2 leh Moto3 erawh chu Qatar-ah hian ruahman lawk angin kalpui chhunzawm a ni dawn a, Moto2 leh Moto3 rider te hi pre-season testing neiin kar hmasa atang khan Qatar-ah an awm tawh sa avangin, buaina tur a awm dawn lo.

Coronavirus hi tunah hian khawvel pumin a buaipui meka, Asia atanga darh niin khawvel ram hrang hrangah a dah nasa tawh hle a, infiamna khawvel lamah pawh nghawng a nei chho nasa tial tial zela, Italy lamah  football pawh entu awm lova khelh te a ngaih bakah a then chu sawn hlat te an ni.

Khawvel pumah coronavirus vei hi mi 86,000 chuang hmuh tawh an ni a, sawi tawhin angin Asia pawnah chuan Italy hi a nasatna ber niin mi 1,700 chuangin an vei tih hmuhchhuah tawh a ni a, mi 34 in an thihpui tawh bawk. Italy-ah hian hmar lamah a nasa lehzuala, tunah hian Italy hmar lama awm khaw 11-te chu khar vek an ni a, mi 55,000 chuang chenna a ni.