Honda rider Marc Marquez chu Pathianni khan MotoGP Motegi Grand Prix-ah pakhatna a ni a, kumin chhungin vawi 8 a chakna niin, kum 6 chhunga a vawi 5-na atan world champion a ni leh ta.

Motegi-ah hian Marc Marquez chuan parukna atangin bul a tan thei chauh a, mahse theihtawp chhuahin a bei chho a, a tawpah chuan a thleng hmasa ber a ni thei a, MotoGP world champion a nih theih phah ta a ni.

British rider Cal Crutchlow chu pahnihna niin Suzuki rider Alex Rins chu pathumna a ni a, Yamaha rider Valentino Rossi chu palina a ni bawk.

Intlansiak tan atangin Marquez chuan result tha neih tumin a bei nghal a, parukna atangin tan mahse lap hmasa ber an tlan zawh hmain pahnihnaah a awm hman a. Pole position changtu Andrea Dovizioso nen chuan tlan hmasa zawk nih inchuhin an bei ngar ngar a, lap 21-ah Marquez chuan Dovizioso hi a lehpel ta a.

Dovizioso hian Marquez chu lehpelh leh tum mahse a chetsual zui vangin a lehpel thei ta lo a, chesual mahse a tawp mai duh bik lo a, a tlan chhunzawm ve leh zel a, a tawpah 18-naah a thleng a. Hemi hnu hi chuan Marquez chu tu mahin an lehpel leh ta lo a, a tawp thlengin hma hi a hruai ta a ni.

Kum 25-a upa Marc Marquez hi MotoGP rider zingah chuan vawi 5 champion thei naupang ber a ni a. Valentino Rossi chu 2005 a MotoGP title vawi 5-na a lak khan kum 26 a ni a. Marquez hian 500cc MotoGP title lak hnem lamah Mick Doohan a nihrual ta chiah a, anni aia title la hnem hi pahnih chiah an awm tawh a, Valentino Rossi (7) leh Giacomo Agostini (8) te an ni.

MotoGP World Standing 2018 ah Marc Marquez hian point 296 a hmu a, pahnihnaa awm Andrea Dovizioso chuan point 194 a hmu a, Valentino Rossi chu pathumna niin point 185 a hmu bawk a ni.

MotoGP Motegi Grand Prix result:

1 Marc Marquez, Honda
2 Cal Crutchlow, Honda
3 Alex Rins, Suzuki
4 Valentino Rossi, Yamaha
5 Alvaro Bautista, Ducati
6 Johann Zarco, Yamaha
7 Maverick Viñales, Yamaha
8 Dani Pedrosa, Honda
9 Danilo Petrucci, Ducati
10 Hafizh Syahrin, Yamaha
11 Franco Morbidelli, Honda
12 Bradley Smith, KTM
13 Pol Espargaro, KTM
14 Katsuyuki Nakasuga, Yamaha
15 Takaaki Nakagami, Honda
16 Xavier Simeon, Ducati
17 Jordi Torres, Ducati
18 Andrea Dovizioso, Ducati
19 Scott Redding, Aprilia
20 Thomas Luthi, Honda
21 Sylvain Guintoli, Suzuki

Retired
Andrea Iannone, Suzuki
Karel Abraham, Ducati
Jack Miller, Ducati
Aleix Espargaro, Aprilia