​Monza-ah Hamilton pakhatna

07th September 2015, 03:09AM

Monza-a Italian Grand Prix-ah Mercedes driver Lewis Hamilton chu pakhatna a ni a, kumin intlansiak vawi 12 neih tawhah vawi 7 pakhatna a ni ta a, a team-mate leh Championship-a amah hnaih ber tu Nico Rosberg erawh a tlan chhuak zo lo, Hamilton hian point 53 in hma a hruai fal ta a ni.

Hamilton hi pakhatna ni mahse a tyre avangin chhui chian a ni a, intlansiak tan naah a ke hnung veilam chu a puar dan tur dik tak aia thep a ni a, chhui chian a ni chhunzawm nghal a ni. Ferrari driver Sebastian Vettel chu pahnihna niin, Williams driver Massa chu pathumna a ni a, Williams tho Bottas chu palina a ni a, Ferrari Raikkonen chu pangana niin Force India driver pahnih Perez leh Hulkenburg ten an dawt a ni.

Nico Rosberg chu pahnihna a ni tawh dawn emaw tih laiin lap thum la awmin engine failure vangin a tlan chhuak ve ta lo a. Mercedes chuan tyre pressure dik loh avanga penalty an chawi hlauh takin tiin Hamilton chu penalty hisap ranin an tlan tir a, pahnihna aia 25 seconds-a fal turin an bei ta a, a tawp line an thlen chuan pahnihna Vettel chuan 25.0 seconds-in a phak lo chiah chiah bawk a ni.

Pakhatna Hamilton chuan,"Ka team-te ka chhuang em em a, an hnathawh a ropui. Tyre investigation chungchang erawh ka ngaituah lem lo, ka buaipui tur a nih loh avangin. Kar duhawm tak ka hmang a ni," tiin a sawi.

Intlansiak zawh darkar hnih hnuah tyre enchiangtu Stewards chuan action lak a nih loh tur thu a puang a, heti hian Hamilton chuan point 53 in Rosberg lakah hma a hruai ta. Hamilton hian 252 points a nei a, Rosberg chuan 199 points a nei a, Sebastian Vettel chu Championship-ah pathumna niin, 178 points a nei mek a ni.

Hamilton hi pakhatna vawi 40 a ni ta a, Michael Schumacher chu record chelhtu a la ni reng a, intlansiak vawi 91-ah pakhatna a ni a, Prost (51) chuan dawtin, Senna (41) leh Vettel (41) te chuan an dawt leh a, Hamilton hian kumin chhung hian Senna leh Vettel-te khumna chance a nei tha hle a ni.

picture credit : Formula 1 (@F1)

Copyright © inkhel.com 2024. All rights reserved.