Arsenal leh Barcelona striker hlui Thierry Henry chuan Major League Soccer club a enkawl dawna, Montreal Impact chuan an manager thar atan kum 42 mi Henry hi an lalut.

Montreal hian Henry hi kum hnih leh a chanve daih contract an ziahpuia, an duh chuan thla 12-in Henry-a contract neih hi an pawhsei belh thei bawk dawn.

Henry hi MLS lamah a mikhual lo hle a, kum 2010 khan Barcelona chhuahsanin MLS club New York Red Bulls a zawma, kum 2014-a inkhel a chawlhsan thlengin New York Red Bulls tan hian a khel.

Inkhel a chawlhsan hnuah Henry hi Roberto Martinez-a thlazar hnuaiah Belgium assistant coach hna a thawka, nikum khan Ligue 1 club AS Monaco chuan an manager atan Henry hi lalut mahse Monaco hi a chet thatpui hleihtheih loh avangin thla thum hnuah ban a ni.

Henry chuan Montreal a zawm chungchang sawiin, “Montreal Impact manager ka ni thei hi ka lawmin ropui ka ti em em a, MLS-a ka kir leh thei tur hi ka lawm hle bawk. MLS hi ka league hriatchian a ni a, hun hlimawm tak tak ka lo hman tawhna hmun a ni,” a ti.

Arsenal leh France tana goal khung hnem ber Henry hi karleh Thawhtanni hian Montreal chuan chanchinthar lakhawm tute hmaah an pho chhuak dawn a, a hna hi nakkum January thlaah, 2020 MLS season thar intan hma deuh atangin a tan dawn a ni.