Monaco khelmualah Higuain goal hnih hmanga an chak hnuah anmahni mualah Juventus chuan 2-1 in an mkhual Monaco an hneh a, aggregate chuan 4-1 a ni a, Juventus hian Champions League final an lut ta, final-ah hian Atletico Madrid leh Real Madrid chak zawk zawk an tum dawn a ni.

First half-ah Juventus hian Mandzukic leh Alves hmangin goal hnih an khung a, second half-ah Mbappe chuan goal khat khung mahse Italian champion hi an lehthal thei ta lo a ni.

Juventus 2-1 Monaco

(Mandzukic 33', Alves 45') (Mbappé 69')

(4-1 agg)

Juventus XI: Buffon; Barzagli, Bonucci, Chiellini; Alves, Pjanić, Khedira, Sandro; Dybala, Mandžukić; Higuain.

Monaco XI : Subasic; Raggi, Jemerson, Glik, Sidibé; Moutinho, Bakayoko; Dirar, Silva; Falcao, Mbappé.

Inkhelh tan atangin Monaco chuan goal khung an mamawh tih an hriat avangin na takin an nawr nghal. Juventus defender te inkhelh tan tirah an rim hle, hetih lai hian hmatawng nei tha Juventus chu nawr bawrh bawrh chi an ni lo tih a rawn lang nghal vat.

Darkar chanve an khel tling vel chiah tihin Juventus chuan Mandzukic hmangin goal an khung a, mual dinglam sir atanga Dani Alves cross tha zet chu Mandzukic chuan a tauh, Subasic chuan a lo dang, hemi per hi Mandzukic bawk chuan a pet leh a, a goal ta.

Goal hnihna hi first half tawp dawna lut a ni a, Juventus chuan corner an hlawhchhuak a, corner atanga ball kal chu Subasic chuan a hnek chhuak, leia ball a tlak hmain Dani Alves chuan box pawn atangin a volley, a goal mawi kher mai.

First half-ah Juventus hian goal li emaw lai khung theihna chance an nei a, Higuain, Dybala leh Mandzukic te chuan chance neiin, Monaco goalkeeper Subasic chuan a lo dang hlawm a ni.

First half tan tir ang bawkin Monaco chuan second half tan tir atangin an nawr tan lehnghal a, Mbappé chuan Juventus defender te tan harsatna a thlen zauh zauh. A shot tha zet chu Buffon chuan a lo dan sak hnu lawkah Mbappé chuan goal a khung ta nge nge a, 69 mins a ni a, veilam sir atanga Joao Moutinho cross chu near post-a awm Mbappe chuan rang takin a pet goal.

Defender an neih that avangin Juventus chuan goal dang an chhuah tawh lo, hun a tawp chhunzawm a, 2-1 in Juventus chuan hnehna an chang a, aggregate chuan 4-1 in an chak ta a ni.

He match-ah hian Buffon, Barzagli, Bonucci leh Chiellini -te chu khel tha hle mahse; Dani Alves a langsar ber a, Mandzukic goal khung tur a siam sak bakah aman goal a khung nghe nghe. Tin, 1st leg-a Higuain-a goal khung pahnih pawh kha a siam a ni ve ve bawk a ni.

Monaco chuan 1st leg an khelh that loh a tuar a, away-ah theih tawp chhuah tumin game open takin an khel a, tlar hnung leh tlar hma nei tha Juventus chu an chungnung leh ta nge nge a ni.

Semi final pakhat zawkah Real Madrid chu si thum faiin hman an hruai mek, final lut tur pawha rinkai an ni bawk a, Juventus chuan Real Madrid leh Atletico Madrid chak zawk zawk chu Cardiff-ah an hmachhawn dawn ta a ni.

Pictures credit : Reuters