25 May 2015 07:51

digimalt

​Monaco GP-ah Rosberg pakhatna

Pathianni tlai khan Monaco GP tlan a ni a, German Driver Nico Rosberg chu pakhatna niin, a zawnin kum thum Monaco GP-ah hian pakhatna a ni ta a ni.

Pole atanga bul tan Hamilton erawh Safety car tlan laiin an thil tum a hlawhchham a, pathumna a nih phah a, Ferrari driver Vettel chu pahnihna niin Hamilton chu a lawm lo hle nghe nghe a ni.

A tir atangin Hamilton hian intlansiak hma a hruai char char a, lap 64-ah Verstappen chu a chesual hlauh. Hetah hian safety car a rawn tlanchhuak a. Mercedes team chuan pit-ah Hamilton an ko lut. A rawn chhuak leh chiah chu Rosberg leh Vettel ten an rawn tlanpel chiah chiah si a, pakhatna ni tur kha pathumna a nih phah ta a ni.

Red Bull driver an che chhelo hle a, Daniil Kvyat chu palina niin pathumna Hamilton a umphak teuh thin hle a, lap 3 vel chu la awm selang chuan Hamilton kha a lehpelh ngei rin a ni. Daniel Ricciardo chuan fastest lap neiin pangana a ni phak bawk a ni. Force India Nico Hulkenberg chu a tir lamah a chet that loh avangin 12-na a ni a, hetih lai hian a thianpa Sergio Perez erawh pasarihna a hauh phak a ni.

Drivers Championship-ah Hamilton chuan hma hruai mahse Nico chuan a hnaih ta hle a, Hamilton hian 126 points a nei a, Nico chuan point 10 chauhvin a phak lo mek, Vettel pawhin 98 points a nei mek a ni. Intlansiak zawha Hamilton a thinrim hle a, "Kan chak lo a ni, hrehawm ka tih dan hi ka sawi chhuak thiam lo a ni," tiin a sawi. Mercedes engineer Peter Bonnington chuan Hamilton hnenah ngaihdam a dil nghal nghe nghe a ni.