30 May 2016 06:13

Inkhel

Mizo Sports Website hmasa ber

​Monaco GP 2016-ah Hamilton pakhatna

Tlan kawng te takah chuan Pole chan a pawimawh em em thin, chutih laiin Pole atanga bul tan Red Bull driver Daniel Ricciardo tlanpelin Mercedes driver Lewis Hamilton chu Monaco GP-ah pakhatna a ni a, tun season-ah pakhatna a vawi khat nihna a ni.

Red Bull chuan Pit stop-ah tihsual lian tak an neih avangin Hamilton chuan Ricciardo chu a tlanpel thei hlauh a, Red Bull car kha chak zawk mahse Hamilton chuan a tawp thlengin a dang thei ta a ni.

Monaco GP-ah hian Championship-a hmahruaitu Nico Rosberg chu 7-na a ni a, Hamilton chuan point 24-in Rosberg hi a thlau ta a ni. Red Bull driver naupang Max Verstappen chuan qualifying-ah chhe taka a tlan hnuin intlansiak tak takah a chesual chhunzawm bawk a, Ferrari driver Kimi Raikkonen pawh a chesual bawk a ni.

Force India driver Sergio Perez chu pathumna niin a vawi khat nan Force India chuan podium an chang a. Monaco-ah hian a tirah ruah nasa takin a sur a, Safety Car kaihhruaina hnuaiah intlansiak tir lam an tlan. Ricciardo chu tlan tha hle mahse pit stop-a a luhin a tyre hman tur an lo ruahman sak hman lova, Hamilton chuan hei hi a hmang tangkai ta a ni.

Ricciardo-a car a chak hle a, Hamilton tan pawh buaina tham a ni. Ricciardo hian Lewis hi pelh tumin a veh reng a, Hamilton hian huaisen takin a dinhmun a veng char char, vawi khat phei kha chu Ricciardo tana hlauhawm tur khawpin bangah an innek chilh teuh hle a, Stewards chuan investigation nei mahse hremna lekna tham niin a hre ta lo a ni.

Renault driver Kevin Magnussen chu pit atanga a tlan chhuak thui a tlan hmain na takin bangah a insu a, mahse hliam erawh a tuar lo hlauh. Sauber driver pahnih inpelh tum an insu palh bawk a, yellow flag vai a ni deuh reng bawk a, intlansiak hmuhnawm tak a ni.

Monaco GP result

1. Lewis Hamilton, Mercedes, 78 laps

2. Daniel Ricciardo, Red Bull, +7.3s

3. Sergio Perez, Force India, +13.8s

4. Sebastian Vettel, Ferrari, +15.8s

5. Fernando Alonso, McLaren, +85.1s

6. Nico Hulkenberg, Force India, +93.0s

7. Nico Rosberg, Mercedes, +93.3s

8. Carlos Sainz, Toro Rosso, +1 lap

9. Jenson Button, McLaren, +1 lap

10. Felipe Massa, Williams, +1 lap

11. Valtteri Bottas, Williams, +1 lap

12. Esteban Gutierrez, Haas, +1 lap

13. Romain Grosjean, Haas, +2 laps

14. Pascal Wehrlein, Manor, +2 laps

15. Rio Haryanto, Manor, +2 laps

DNF Marcus Ericsson, Sauber

DNF Felipe Nasr, Sauber

DNF Max Verstappen, Red Bull

DNF Kevin Magnussen, Renault

DNF Daniil Kvyat, Toro Rosso

DNF Kimi Raikkonen, Ferrari

DNF Jolyon Palmer, Renault