Liverpool chuan Vitality Stadium-ah Bournemouth an luhchilh a, an mikhualna ramah Mohamed Salah chuan hattrick a siam a, Liverpool chu 4-0 ngawtin a chakpui.

Bournemouth hi tun hnaiah an che fuh vak lo a, mahse Huddersfield an hneh hlauh mai a, hei hian an che chhe kal tluang chu a chhawk ve leh zuai a. Liverpool an hmachhawn leh a, anmahni khelmualah point an hlawh chhuak zo ta lo a. Anni hian Huddersfield nen an inkhelh tuma an inrem dan chu pahnih an thlak danglam a, inhliam vanga khel thei lo Lewis Cook aiah Andrew Surman a lut a. An goal thuntu khawl Callum Wilson aiah Junior Stanislas chuan bul a tan bawk a ni.

Tun season chhungin Liverpool hian hneh loh an la tawng lo a, an khelh hnuhnun ber tumin Turf Moor-ah Burnley chu an hneh a, hmahruaitu Manchester City aiin point 2 chauhin an hniam a. Burnley nen an inkhelh tuma mi panga ngawt mai chu Klopp chuan a thlak a, tlar hmaah Mohamed Salah leh Roberto Firminho te chu an inkawp a. Xherdan Shaqiri pawhin bul a tan a, Sadio Mane chu substitute bench lamah a awm thung a, Moreno aiah Andrew Robertson chu a lut nghal bawk a. Joe Gomez inhliam vangin James Milner chu a aiah a ding bawk a ni.

Bournemouth (4-4-1-1): Asmir Begovic; Simon Francis, Steve Cook, Nathan Ake, Charlie Daniels; Junior Stanislas, Jefferson Lerma, Andrew Surman, Ryan Fraser; David Brooks; Joshua King

Subs: Artur Boruc, Marc Pugh, Lys Mousset, Jordon Ibe, Jermain Defoe, Diego Rico, Tyrone Mings

Liverpool (4-3-3): Alisson; James Milner, Joel Matip, Virgil van Dijk, Andrew Robertson; Naby Keita, Fabinho, Georginio Wijnaldum; Xherdan Shaqiri, Mohamed Salah, Roberto Firmino

Subs: Sadio Mane, Jordan Henderson, Daniel Sturridge, Adam Lallana, Simon Mignolet, Divock Origi, Trent Alexander-Arnold

Inkhel an tan phat atangin mikhual team zawk Liverpool chu an che na nghal hle a, a thlengtu zawk ni mahse Cherries chu an che thei vak lo hle a. Liverpool chuan hun remchang insiam tumin theihtawp an chhuah nghal char char a, ball pawh an chang hnem viau a ni.

Tan atanga minute 25-ah goal hmahruai a lut a, Roberto Firmino chuan hla deuh tak atangin Bournemouth goal ah chuan ball a pet phei a, ball hi goalkeeper Asmir Begovic chuan a lo dang per a. Ball kal zel hi Mohamed Salah chuan goal ah chuan thunin Liverpool chu hma a hruaipui a, Salah hi offside ngei niin a lang a, mahse referee te chuan an ham loh avangin a goal thun chu an pawm tlang ta a ni.

Half time thlengin goal dang a luh belh lo a, Jurgen Klopp-a pawlte hian first half chhungin ball chu 70% vel zet an chang a, mahse goal thun lamah duhthu an sam lo a, 1-0 chauhin hma an hruai thei a ni.

Second half an khel leh a, an tan leh deuh chauh tihin Egyptian superstar a che leh a, goal ropui zet mai a thun nghal a. Minute 48-ah Bournemouth Steve Cook ball pek sual chu Roberto Firmino chuan lain Mohamed Salah chu a pe a. Salah hian ball chu lain a tlanpui a, a ke veilam hmangin an goal hnihna hi a thun a ni.

Bournemouth defender Steve Cook a che fuh lo laklawh a, a tihsual vangin Liverpool in goal hnihna an thun a, minute 68-ah Andy Robertson chuan vei lam sirah ball a tlanpui a, Bournemouth box lamah ball chu a vawrh phei a. Heta ball kal hi Cook chuan Mane leh Salah te hnen a thlen hmain a lo khawih a, mahse ball chu anmahni goal chhungah a lut hlauh mai a, Liverpool chuan 3-0 in hma an hruai theih phah a ni.

Minute 77-ah Mohamed Salah chuan Liverpool goal 4-na thunin hattrick a siam a. Lallana ball pek chu Salah hian a um a, Steve Cook nen ball chu umin Salah hi a la thei zawkah a tang a, Begovic chu a bum leh a, hemi hnu hian goal-ah chuan a thun a. Salah hi Liverpool player zingah chuan March 2014 a Cardiff laka Luis Suarez-a�n hattrick a siam hnuah away game-a hattrick siam leh thei hmasa ber a ni.

Hemi hnu hian goal dang a luh belh ta lo a, hun tawpah Liverpool chu 4-0 ngawtin an chak ta a ni.

Reds hian Premier League game 16 khel tawhin, game 10 ah goal an chhuah lo ta a, Manchester City in an khelh ve hma chuan Liverpool hian point 1 in an lehpel a, Premier League hmahruaitu an ni thei a ni.