Footballer te chuan goal an thunin lawm dan bik an nei fo a, Mohamed Salah pawhin mi tih loh danin a goal thun chu a lawm thin.
Inkhelah chuan goal thun chu a pawimawh lai ber niin, hetiang ti thei tur hian team pahnihte chu khelmualah an inep thin a. Heti taka a pawimawh avang hian goal thun theitute tan chuan lawm loh chi hi a ni lo a ni.
Cristiano Ronaldo chuan goal a thun hian ‘Si!’ hmangin a goal thun hi a lawm thin a, Antoine Griezmann pawhin lam dan chi hrang hrangin a goal thun chu a lawm thin bawk a. Peter Crouch khan goal a thun chuan ‘Robot dance’ hmangin a lawm thin a, a larpui hman hle.
Liverpool striker Mohamed Salah chuan goal a thun hian lawm dan chi hrang hrang a nei a, chutiang ho chu han thlir kual zawr zawr ila.
Yoga celebration
2018-19 season tawp lamah khan Egyptian King chuan goal a thun changin lawm dan chi thar a chiang chhuak a. He goal lawm dan thar hi yoga ti thinte tan chuan hriat hmaih theih a ni lo.
Anfield-a 2-0 a Chelsea an lo hneh tumin an goal hnihna hi Salah chuan a thun a, heta goal a thun hian Liverpool tantute thutna lamah chuan pheiin yoga celebration hi a va hmang a. A ke veilam chu a khup dinglam bawr velah a dah chho a, a kut pahnih chu tawngtai ang deuhin a dah bawk a ni.
An inkhelh zawhah hian Salah chuan Sky Sports hnenah, “Yoga ti thin ka ni a. Hetiang ka tih thin avang hian goal ka thun khan khatia tih kha a lang thut a ni,” a ti.
Hemi hnuah hian Salah chuan Egypt tana goal a thun pawhin hetiang hian a goal thun chu a lawm ve thin a ni.
Nose celebration
2019 UEFA Champions League final-a Tottenham nen an inkhelh khan Salah chuan Liverpool goal hmahruai a thun a, heta goal a thun hian a goal lawm dan chu a danglam hle.
Reds striker hian a kut zungtang chu a kawkalhin a dah a, a hnar sir ve veah dahin, a hnar kua chu a tiphui a, hetia ti chung hian a lei a chhuah bawk a ni.
Hetianga a tih chhan hi Salah chuan a la sawi fiah ve lem lo a, chuti taka awmze nei thui lem lo, Tottenham tantute chhiatkhum ve hrim hrim te pawh a ni thei a ni.
Outstretch arms celebration
Salah goal thun changa a lawm dan lar tak mai pakhat chu mipui hmaah a ding a, a hmel tidanglam vak chuang loin a ban chu a pahnihin a phar vak thin.
Hetianga a tih hi chuan Ridley Scott-a film siam Gladiator a Russell Crowe-a’n Maximus anga a chana a tih dan kha rilruah a lang thin a. Maximus khan mipui lam hawiin a ban a phar a, hmuhnawm an tih leh tih loh a zawt a ni.
Liverpool tantute chuan Salah pualin hla an sa thin a, chumi lo dawnsawn paha ban phar te pawh a ni ve thei tho bawk a. Egyptian lalpain a khua leh tuite a lo lawm ang deuhin Salah hi a che ve niin a ngaih theih.
Prayer celebration
Footballer dang tam tak ang bawkin Mohamed Salah hi sakhaw ngaihsak deuh mai a ni a, goal a thun hian a chang chuan khelmualah chuan a thingthi a, a lu chu lei a siktir a, a tawngtai thin a ni.
Hetianga tih hi ‘sujud’ an ti a, khawvel hmun hrang hranga Muslim footballer te chuan an ti ve fo thin a, Salah khelhpui Sadio Mane pawhin a ti ve thin a ni.