Mobile Legends: Bang Bang World Championship (M1) chu Axiata Arena, Kuala Lumpur-ah neih mek a ni a, lawmman atana sum an sem ral tur pawh Rs. 1,79,08,750 ($250,000) a tling.

M1 hi group stage atanga khelh tan niin group stage hi November ni 11 leh ni 14 inkar khan khelh a ni a, Team 16 an tel a group stage hi Main Event-in zui nghalin November ni 15 khan khelh tan niin November ni 17-ah zawh fel a ni ang.

He intihsiakna khel tur hian qualifying round hrang hrang siam a ni a, Mobile Legends: Bang Bang Professional League (MPL) hmangin Malaysia, Singapore, Indonesia, Myanmar leh Philippines-te'n luh theihna an nei a, MPL khel ve lo in Cambodia, Thailand and Laos, Vietnam, Japan, Turkey, Russia, United States leh Brazil-te'n qualifying round an khel ve bawk.

Mizote pawhin kan khelh nasat em em Mobile Legends hi Shanghai, China-a inbun MOONTON chuan an siam a, MOONTON hi kum 2014 khan din niin an thang chak hle. Tunah hian China, Turkey, Russia, United States, Kazakhstan, Myanmar, Malaysia, Indonesia leh Singapore-ahte hnathawk mi 300 chuang an nei mek a, China-a company thang chak zingah an tel.

Mobile Legends hi mobile Multiplayer Online Battle Arena (MOBA) zinga lar berte zingah a tel mek a, ram hrang hrang 135 atangin kheltu (player) an nei tawh bawk a server pawh 1200 chuang khawvel hmun hrang hrangah an nei bawk a ni.