Boxer ropui Floyd Mayweather chuan mixed martial arts khawvel luhchilh a rilruk thu a sawi hnuah training pawh a ti tan tep niin a sawi.

Mayweather hian UFC welterweight champion Tyron Woodley nen an inbe tawh nia sawiin, an pahnih hian an thawk dun dawn niin a sawi a. Tun thla tir lamah khan Woodley pawhin Floyd nen an thawh dun tur thu hi a lo sawi lang ve tawh bawk.

"Bul kan tan tep tawh a, kan inbe chho ve reng tawh a, rei a ni tawh lo ang," tiin Mayweather hian a sawi.

Nikum August thlaa UFC star Conor McGregor nen an inbeih hnuin Mayweather (50-0, 27 KOs) hian boxing a chawlhsan thu a puang zui a. Hemi hnu hian UFC luhchilh lampang a sawi ri ve leh zeuh thin.

Kum 41 a upa Mayweather chuan MMA huang chhunga a luh chuan mi tam takin an dah sang vak dawn lo tih sawiin, a thiamna chu tam tak aia a nep bik loh tur thu a sawi.

"Inbuan vel hi ka thiam fu a, wrestling-ah chuan ka chhe hauh lo ang. 1 atanga 10 tehfung hmang ta ila, wrestling bikah chuan 7 vel ka nih ka ring a. Inzir belh hnuah 9 velah ka chhoh theih ka ring," tiin Mayweather chuan a sawi.

A sawi zelnaah, "Ka kut hi ka hmang thiam hle a, 1-10 ah chuan 100 vel a ni hrim hrim a. Ka ke erawh chuti lutukin ka hmang thiam lo ang a, 1-10 rating pek tur ni se 4 vel bak ka nih ka ring lo," a ti bawk.

December thla khan UFC President Dana White chuan Mayweather hi sawm luh an rilruk ve deuh thu a lo sawi tawh a ni.

Floyd Mayweather hian UFC a luhchilh hmain thla 6 atanga thla 8 vel a inpuahchah phawt a ngaih tur thu sawiin, a inpeih huna a khingpui tur erawh sawi theih a la nih loh thu a sawi a. A lut tak tak a nih chuan McGregor nen an intum nghal a rinawm loh a ni.

Tun hnaiah Mayweather hian UFC ah $1 billion velin contract a ziah theih a rin thu a sawi a ni.