05 Nov 2019 01:07

bakteaJr.

Mizo tlangval

​MMA professional fight turin Dawnga'n contract a ziak

MISMA (Mizoram State Mixed Martial Arts Association) hma lakna hnuaiah MMA fighter PMS Dawngliana, Kawrtethawveng chuan Middle East-a MMA promotion company lian ber, Bahrain lal fapa din ‘Brave Combat Federation’-ah November ni 4, 2019 khan contract a ziak fel. Brave hian ram 14-ah event an nei kual ṭhin a, ram 40 aṭangin contract fighter an nei bawk. Debut fighter-te hlawh hi khawvela MMA promotion company lian ber UFC nen an hlawh a inang. November ni 23, 2019 hian Hyderabad, India-a event an rawn nei dawn a, MTV-ah live-in a en theih ang. PMS-a pawh hi he event-ah hian a fight ve nghal dawn. A contract-a a fight purse tur chu $1000 (₹70,000) a ni ang a, win purse $1000 tho a awm leh; a chak zawk chuan ₹1,40,000 a hlawh thei dawn tihna a ni. Cornerman pakhat nen thlawhna man leh 5 star hotel thlenna leh ei man leh a ṭul dang zawng zawng an tumsak vek dawn.

PMS-a hi a traditional art style chu Taekwondo a ni a, chutah pawh chuan a hlawhtling hle a, MMA-ah hian Mizote zinga amateur record nei ṭha ber pawl a ni bawk. Vawi hnih national silver medalist a ni tawh a, MFL (Mizoram Fight League) Flyweight champion lai a nih bakah a MMA record hi 11-3-0 a ni. Contract a ziah ni aṭang hian MISMA Technical Chairman Samuel Lalrozâma, Dawrpui hnuaiah personal training ngawrh takin a ṭan nghal. MISMA president Lalṭhakima chuan MMA hi India ramah a rawn lâr chho mek a, MISMA pawhin hetiang fight night lianah hian inthawn zel an tum thu a sawi a, December-ah pawh X1 International fight night-ah Mizo fighter 4 thawn an tum thu leh Dawrpui Multi Purpose Center-a Zonet nen ṭang kawpa MFL neih vat an tum thu a sawi bawk. "MMA hi khawvel hriata Mizote hming inpho chhuahna platform ṭha tak a ni a, mi tam tak ngaih dan anga mahni art pawlh dalna ni lovin thiamthil neih belh zawkna leh mahni traditional art chawimawina hmun a ni zawk. Dawnga pawh hi a fight hunah a style chu Taekwondo a ni tih an tar lang ngei dawn a, tunah hian striking-ah a ṭha thawkhat viau a, a style hi kan thlaksak dawn lova, kan improvise zawk ang a, ground technique nasa takin kan zir belh bawk ang. Hei bakah hian fitness ṭha tak nei tura kan beih bawk chuan Pathian zarah a chak ngei kan beisei," tiin a coach Samuela chuan a sawi.