Mizoram State MMA Association (MISMA) leh Zonet ṭang kawp chuan hlawhtling taka Mizoram Fight League an huaihawt hnuah tunah hian Zo Fight Promotions nen ṭang kawpin MMA Gym Challenge a huaihawt leh dawn. He event hi Zo Fight Promotions organize leh sponsor tur a ni a, MISMA hi technical commission a ni ang a Zonet chu tv partner a ni ang. Radio Gupshup 94.3 FM chu radio partner a ni bawk. Zo Fight Promotions pvt. Ltd. CEO chu Dr. Jeremy Lalrinsanga Pautu a ni a, COO chu Samuel Lalrozâma a ni. He company hian Zofate thiamna leh an tui zawnga intundin chhoh hi a tum ber a ni. A hma pawhin JSJ Fight League leh Grit a lo sponsor tawh. Tunah hian bul ṭan thar nan gym level MMA fight a huaihawt leh dawn a, season one hi May aṭanga December 2019 thleng a ni ang, Zonet Rihnimah thlatin fight thursday zan dar 8 ah en theihin a awm ang. He event hi event lian zawk inbuatsaih chhoh nana tih a ni a, Mizo fighter ten experience tam thei ang ber an neih nan leh a ṭha zawnga tih lar nan a ni. Tin, gym fights ni mah se fighter zawng zawngte an intundin theih nan incentive cash award pek ziah an ni ang.

Fighter te hi class A, B leh C ah then an ni anga, mahni level ang zel sparring pui tur set a ni ang, tichuan ranking te siam a ni ang, professional rules-a lo khel tawhte leh national/ MFL lo champion tawh te chu Class A an ni ang.

Youtube lamah thla khat hnuah upload ṭhin a ni bawk ang. 27.04.19, 8am hian SPES gym, Dawrpuiah weighin leh medical check neih tur a ni a. Hemi ni hian MSACS nen ṭang dunin HIV test neih nghal a ni bawk ang. Passport size photo ken tur a ni bawk ang.