Khawvela game rorum leh ṭhang chak berte zing ami MMA (Mixed Martial Arts) chuan Mizoramah hmun a rawn khuar ve mek a; Zo Fight Promotions company sponsor-in Mizoram State MMA Association leh Zonet chuan tun kum awh tur "MMA gym challenge" a huaihawt. He event-ah hian International MMA Federation hnuaia MMA amateur rules hmanga him taka kan fighter ṭhang chho mekte kawng sialsak an ni.
He event-ah hian mizo fighter kei ka ni inti chinte an innuai a, martial arts game hrang hrang zir ṭhinte'n a ṭha ber nih tumin fight an nei ṭhin.
MMA Gym Challenge 5 ah hian bout hmasa berah Zomuanpuia leh Khawma an insual a, tharum lamah Khawma a chungnung deuh a, round hnihna atang phei chuan bawhbet zuiin game a thunun chho angreng viau a, unanimous decision hmangin hnehna a chang zui nghe nghe. Bout hnihna ah Frankie R Lalmuanpuia leh Lalawmpuia an insual thung a, round tan phat atangin Luangmual fighter Frankie-a hian a nawr angreng viau a, second round-ah arm bar hmanga a man beh hnu phei chuan submission hmangin a chak. Insual tawp berah kickboxing background atanga MMA rawn khel chho Samuel Lalthlamuana chuan Lalhruaitluanga a bawhbet hnuin a hnek zui mawlh mawlh a, Hruaitluanga'n chhanna a nei thei si lo, referee inrawlh vatin second round, minute 1:19 ah technical knockout-in Samuel Lalthlamuana a chak bawk.
He event-a telte tan event lian takin season hi khar a ni ang. Mizo fighter te hian experience an ngah chhoh zel theih nan leh hei aia event lian zawk, SFL, ONE leh UFC thleng pawha kan inkah kai theih nan grassroot level-a hma lak a ni. A tel turte physical condition leh fitness uluk taka check-sak ṭhin an ni.
MMA Gym challenge hi May atanga neih niin; December, 2019 thleng awh tur a ni a, December thlaah hian Mizoram pum huap leh State danga medal lo la nual tawh MMA fighter rothap tak tak an innuai ang.
Fights
Strawweight
1.Khawma (Luangmual) def. Zomuanpuia (Tuithiang) By unanimous decision
Welterweight
2.Frankie R. Lalmuanpuia (Luangmual) def. Lalawmpuia(Durtlang Leitan) by armbar Submission, 2nd round.
Featherweight
3.Samuel Lalthlamuana (Ramhlun N) def. Lalhruaitluanga (Luangmual) by TKO, 2nd round