Ni 8.8 2019(Nilai thawhtan) zan khan Spes Gym, Dawrpui, Aizawl-ah MMA Gym Challenge 4 neih zawh a ni ta a, he event hi Zo Fight Promotion chuan a sponsor nghe nghe. Meghalaya atangin fighter rothap tak tak an inlan nual. He event-ah hian Chief Guest atan 4th dan ju jitsu black belt John Michael Gordon niin; amah mai bakah foreign atangin martial arts lama tawnhriat lo nei hrep tawh Bryan-an a hmanpui bawk a, ani bakah hian Asian khawmualpuia MMA organisation lian ber ang hiala chhal ngam, One FC-a contract signed thar Deepak Harpal Singh-an a hmanpui bawk.

Bout hmasa berah V.L.Hmangaiha leh Hmingmuanawma an insual a, round tan phat atangin Hmingmuanawma hian striking game a khel nasa angreng a, inpawmchilh lama luhpui a tumlo bur a ni ber. Hetih lai hian Hmangaiha hian a hnek fuh chhunah a hnar a hnek thi sak hlauh maia, round hnihna atangin round thumna thleng a nawrtu zawkah a trang chho. Unanimous decision hmangin Hmangaiha chakah puan a ni zui ta nghe nghe.

Hemi zawha insual Joseph leh Vicky Paul pawh a hmuhnawm angreng viau. Referee-in insual tura thu a pek veleh Lunglei fighter Vicky Paul-an a paih thlu nghal maia, hemi hnu rei vak lovah Joseph-a hian a bawhbet leh ta zawk si. Mipui lam an phur a, insual boruak a sosang viau. First round chu Joseph-a a chungnung hret a tih theih ang. Second round-ah Vicky Paul a chau tan tih a hriat theih a, hetih lai hian tlawm mai a tumlo hle tih a hriat. Third round an thleng, round tawpna berah erawh Vicky Paul a che tha deuh thung a, round tawp dawnah phei chuan bawhbet zawkah trangin a hnek mawp mawp a, round a tawp. Judge te thuthlukna ah split decision-in Joseph-a chakah puan a ni zui.

Darren leh Lalawmpuia insual bawkin Meghalaya fighter Darren-an hnehna a chang. Hemi dawt chiah hian Meghalaya fighter Gary Lyndah leh Sangthanhlira an insual thung a, round hmasa ber atangin Gary a che tha viau a, technical knockout-in a chak zui ta nghe nghe.

RB Lallianzova leh George Lalmuanawma insual an nghakhlel tawh. Round tir lamah George-a che tha viau mahse, round a rei tak hnuin Lianzova a chungnung hret a tih theih awm e. Chak zawka puan a ni zui ta nghe nghe. Meghalaya fighter Echwa Phawa leh Lalrosanga insual a hmuhnawm hle bawk a, an insual chhung zawngin Echwa Phawa-a hian paihthluk tumin a nawr char char a, hetih lai hian Rosanga a inveng thiam nasa si. Meghalaya fighter Phawa-an paihthlu thin mahse, rang takin Rosanga a tho leh zung zung a, remchang a hmuh veleh a hnek veleh thin a, decision hmangin hnehna a chang ta nghe nghe.

Lalthasanga chuan technical knockout-in Balayied Ryntathiang a hneh bawk. Mipui lamin bout hnuhnung ber an nghakhlel tawh viau a, insual hmuhnawm tak ni tura beiseina a sang viau. Round khatna an tan atangin an indimlo hle a, striking range-a an awm laiin chiang zetin Nunpuia'n a kut dinglam hmangin a hnek a, hetah zet zawng Rinsanga a luhai ngang aniang, a tlusawp zuia, knockout hmangin Nunpuia chakah puan a ni zui.

Fights

1. V.L.Hmangaiha def. Hmingmuanawma(By Decision)

2. Joseph Vanlalhruaia def. Vicky Paul(By Decision)

3. Darren def. Lalawmpuia

4. Gary Lyndah def. Sangthanhlira(By TKO)

5. RB Lallianzova def. George Lalmuanawma(By Decision)

6. Rosanga def. Echwa Phawa(By Decision)

7. Lalthasanga def. Balayied Ryntathiang (By TKO)

8. Lalnunpuia def. Lalrinsanga(First round KO)