Conor McGregor chuan MMA fighter awm tawh zawng zawng zingah chuan a ropui ber a nih thu a sawi.

Irish fighter McGregor hian a hmain MMA fighter ropui ber a nih thu hi a lo sawi tawh a, chumi tumah erawh chuan Anderson Silva nen No. 1 an ni dun niin a sawi a. Tun tumah chuan amah chauh chu chungnung ber niin a sawi tawh a ni.

A hmaa fighter ropui ber a nihzia a sawi chuan MMA huang chhungah a ngaihdan pawmpui lo an awm teuh a, heng zingah hian tuna a hmelma lian Khabib Nurmagomedov pawh a tel a ni.

Tun hnaiah Conor-a coach John Kavanagh thil tweet behchhanin McGregor chuan amah sawiseltute a bei let a, GOAT chu amah a nih thu hi a sawi chhuak a ni.

McGregor chuan, “MMA fighter ropui ber thlang tur chuan KO nei hnem ber te, KO rang ber te hi han en kual ula, UFC huang chhung leh pawn lamah pawh hei hi tehfunga hman chi ber a ni ang,” a ti.

“Heng bakah hian a ropui ber thlang tur chuan title la hnem ber chu thlan chhuah awm tak a ni a, division hrang hranga knockout ngah ber pawh tehfung pawimawh tak a ni lo thei lo a. Chutiang hmanga teh kual chuan GOAT hi chu ka ni chiang khawp mai,” a ti bawk.

A sawi zelnaah, “Georges St-Pierre chuan mi 8 a knockout a, Jon Jones pawhin mi 10 chu a knockout ve bawk a, hetiang zat lek hi chu ka tan chuan a nuihzatthlak zawk a ni,” a ti.

Kumin January thlaah khan Conor McGregor chuan Donald Cerrone chu awlsam deuhin a hneh a, hei bak hi chu fight a la nei zui leh rih lo a. Hemi hmaa a insual hnuhnun ber chu October 2018 kha niin, khami tumah khan Khabib Nurmagomedov chu a hneh lo a ni.

Conor McGregor chuan, “Min duh viau ula, min ngaisang hle rawh u. He infiamna huangah hian kei aia ropui hi an awm lo a, chu chu thil nih dan dik tak chu a ni,” a ti.