Khawvela infiamna rothap ber pawl UFC huanga fighter zingah hausa deuh deuh an awm nual a, tun hnuah phei chuan an sum lak luh a ziaawm chho ve zel a, hei vang hian an hausakna pawh a pung chak ve tawh hle.
UFC fighter te hian insual hlawh hrim hrim an lak piah lamah pay-per-view atanga an lak te, bonus an dawnte leh sponsorship atanga sum hmuh te an nei ve thin a. Vawi khat insualah hian an sum lak luh dan chu a inang lo ve hlawm hle a, fighter zinga sum ngah zual thlan chhuah 10 han thlir kual ila.
10. Randy Couture
American MMA fighter thin hi United States Army ah sergeant a ni thin a. Fighter zingah chuan UFC Hall of Fame a lak luh palina niin, tun dinhmunah a hausakna chu $17 million vel niin an chhut.
9. Wanderlei Silva
Brazilian MMA fighter hian title venhim hnem lamah te, knockout hnem leh chak zawn rei lamah record a lo siam tawh hlawm a. 2003 Pride Middleweight Grand Prix Tournament Champion hausakna hi $18 million vel bawr a ni.
8. Fedor Emelianenko
Heavyweight fighter awm tawh zawng zawnga ropui ber tia sawi thin Fedor Emelianenko hi UFC huangah chuan a tel ve ta miah lo a. Russian fighter pa lian tak mai hausakna hi $18 million vel niin an sawi.
7. Anderson Silva
MMA fighter ropui berte zinga sawi tel Anderson Silva hi UFC huanga chak zawn rei ber record siamtu a ni a, a zawnin vawi 16 ngawt mai a chak thei a. Brazilian MMA fighter hausakna hi $18 million vel a ni.
6. BJ Penn
UFC huanga weight category pakhat chauh lo deuha championship belt la thei pathum zinga pakhat BJ Penn hi lightweight huangah hneh thei an awm lo a. American fighter hian lightweight leh welterweight huangah title a la thei ve ve a, tuna a hausakna hi $22 million vel niin an chhut.
5. Brock Lesnar
Infiamna chi hrang hranga inhmang kual Brock Lesnar hian World Wrestling Entertainment atangin UFC a luhchilh a, WWE lamah hian a hnuah a kir leh a. Octagon chhungah hun rei tak inhmang lo mahse a hausakna chu $28 million vel a la ni tho a ni.
4. Georges St-Pierre
Vawi thum ngawt UFC welterweight champion ni tawh George St-Pierre hian 2017 ah khan middleweight title a la a. 2020 ah khan UFC a chawlhsan a, a chawlh hma khan sum a hai lut ve teuh hman a, a hausakna pawh $30 million niin an sawi a ni.
3. Khabib Nurmagomedov
Russian fighter Khabib Nurmagomedov hian 2012 ah khan UFC lamah hun a hmang tan a, a tel tirh atanga a chawlh thlengin record a nei tha hle a, hneh thei an awm lo a, 29-0 record neiin a chawl a. Tuna a hausakna chu $30 million vel niin an chhut.
2. Rorion Gracie
UFC bul tantu zinga mi, Brazilian star hi Octagon chhunga a chet fuh bakah sum lak luh kawngah pawh a che chhe hran lo hle a. Brazilian Jiu-jitsu lama mikhual lo tak niin, ninth-degree red belt a nei a. Tuna a hausakna chu $50 million vel niin an sawi a, infiammi zingah chuan a hausa pawl tak niin an sawi.
1. Conor McGregor
Irish MMA fighter hi Octagon chhung leh pawna huhang ngah em em mai a ni a, UFC huangah mipui hip thei ber tih theih hial niin, Floyd Mayweather nen an inhnekna atangin sum tam tak a la lut a, sumdawnna lamah a che fuh viau bawk a. Tun dinhmunah a hausakna chu $115 million bawr vel niin an sawi a ni.