British boxer unified world heavyweight champion hlui Tyson Fury chuan kuminah MMA lamah a in fight maithei tih thu a sawi a, UFC superstar Conor Mcgregor chuan a train hreh lo niin Fury hian a sawi bawk.

Fury hi tun thla October ni 31 hian WWE-ah a debut match a khel dawn a, Braun Strowman nen WWE event Crown Jewel, Saudi Arabia-a neih turah an inhmachhawn dawna, boruak pawh a sang chho hle.

Fury hian WWE-a a debut match a neih zawhah, thil dang WWE aia boruak sang tur hmachhawp a neih mek thu a sawi bawka, MMA lamah kan hmu thut lovang tih a sawi theih loh.

Fury chuan, “WWE-a ka debut match zawh hian thil liantham tak, tuna mi aia liantham zawk hi hmachhawp ka nei mek a, Tyson Fury hi kuminah a MMA debut kan hmu maithei, “ tiin Sky Sports a hrilh.

A chungchang sawi zelin Fury chuan, “MMA-a luh chungchang hi Conor-a pawh ka sawipui tawha, min train hreh lova, a tha dawn hle in ka hria. Conor-a’n ka inpeih hun hunah Dublin-ah a mah pan mai turin min tia, ka nghahhlel tawh viau bawk.

“Bare-knucle boxing champion ho thlah kal zel ami ka ni a, na tawrh leh thisen in chhuah te hi ka tan thil thar a ni lova, kan thlah kalzelin a ken tel ve reng ni zawkin, MMA-a luha mi sawisak ka chak tawh a ni,” a ti.