MLS khel tawh zingah ka tha ber: Zlatan

16th September 2019, 10:09PM

Zlatan Ibrahimovic chuan Major League Soccer khel tawh zawng zawngah chuan a tha ber a la nih thu a sawi chhuak.

Pathianniah khan LA Galaxy chuan Sporting Kansas City chu 7-2 ngawtin an hneh a, he inkhelah hian Zlatan Ibrahimovic chuan hattrick a siam a ni.

Swedish striker Zlatan Ibrahimovic hian LA Galaxy tan record thar a siam a, 2019 season-ah vawi 25 bul tan tawhin, hengah hian goal 26 a thun tling tawh a. Season khata an club tana goal thun hnem ber record ding lai chu a khum a, a hmaa record chu 2002 khan Carlos Ruiz chuan siamin, goal 24 a thun a ni.

Record thar a siam hnuah hian Ibrahimovic chuan MLS player awm tawh zawng zawngah a la tha ber niin a sawi chhuak a ni.

Ibrahimovic chuan, “MLS khel tawh zawng zawng zingah chuan ka la tha berin ka hria a. Hei hi fiamthu miah loa ka sawi a ni,” a ti.

Barcelona, Paris Saint-Germain, Manchester United leh Inter Milan velah pawh lo khel kual tawh, 2018 a free transfer-a LA Galaxy zawmtu Ibrahimovic hian Major League Soccer bikah game 51 a khel tawh a, hengah hian goal 48 zet chu a thun tling tawh a ni.

“He lai hmun ka rawn pan tirh atang khan ka sawi tawh a, chawlh hmang tura rawn kal ka nih lohzia ka sawi a, a takah pawh ka lantir chiah bawk a. Ka record hi a tha viau a, khelmuala boruak siam turin ka rawn kal a, ka ti chho zel dawn bawk a. Kum hnih ka awm chhung hian thil ropui tak tak ka ti teuh tawh a ni,” tiin Ibrahimovic chuan a sawi.

“Tha taka khelh zui zel hi ka tum a, chet that zui zel theih ngei hi ka duh a. Team tana tangkai thei ang bera awm zel ka duh a, goal pawh thun belh zel ka duh a, thun zel hi ka tum reng dawn a ni,” a ti bawk.

Copyright © inkhel.com 2024. All rights reserved.