USA-a an football league sang ber Major League Soccer (MLS) club FC Cincinnati chuan Manchester United defender hlui Jaap Stam chu an manager atan an ruai.

Cincinnati-ah hian Netherlands defender hlui hian kum hnih daih contract a ziaka, duh chuan a contract hi kum khat dangin a pawhsei belh theih dawna, tunah rih chuan a contract hian kum 2022 thleng a daih.

Stam hian a hma in England-ah Championship team Reading chu kum hnih dawn a lo enkawl tawha, kum 2017 play-offs khel turin a tlinpui nghe nghe. Reading zawhah FC Zwolle enkawlin, hemi hnu hian Feyenoord a enkawl leha, nikum October thla khan Feyenoord manager a nihna atangin a bang.

Kum 47 mi Stam chuan Cincinnati manager thar a nih chungchang sawiin, “Ka tan chuan America-a manager hna thawhna chance neiha, MLS-ah FC Cincinnati ang club ka enkawl thei hi chu ka 'dream' a ni.

“He ram hi ka ngaina sa a, States-a an mipui te rilru puthmang hi ka ngainat zawng tak niin, an thil tum hi ka rilrem zawng tak a ni bawk,” a ti.

MLS hian season an tan thar hnuah vawi hnih chiah an la khel kuala, coronavirus chuan season a ti khailak zui. An game hmasa ber pahnih khelh tawhah Cincinnati hi an tlawm ve ve a ni.