Mizoram Wrestling Association Pro Wrestling 2018 Electric Veng YMA Hall a khelh chu a neih chu. Inrinni zan khan zawh a ni ta. He hunah hian Pu Rammawia SE PHE Deptt chu khuallian a ni a.

Pate Inchai hmasa ber B.Lalawmpuia Thenzawl leh Lalawmpuia Bulfekzawl te inchai an in hneh tawk viau a. An ni pahnih hi thiandun leh training pawh lo nei dun reng tawh an ni a. An khelh dan an in man hle. Round 5 an khelh pawha an la inhnehtawk fo avangin round khat pek belh leh a ni a. Round a zawh pawhin an la inhnehtawk fo avangin inbanphawiah B.Lalawmpuia Thenzawl chu chak zawk niin Pate inchai Champion a ni ta a ni.

Nulaihawl inchaiah Champion lai Lalvenhimi Khawhai leh Lalrinfeli Kolasib te an inkhel a. Tawnhriat ngah leh Nulian Champion thlenga ni mek Lalvenhimi Khawhai hian duh angin a chai thei bik mai lova. Lalrinfeli atang khawng thei hle. Che rang zawk Venhimi a tawpah a ding chang ta zawk Champion a. Pro Wrestling Nulaihawl Champion leh MWA Nulian Champion ni kawp a ni zui ta.

A vawi thumnaah Palaihawl inchaiah K.Lalbiaksanga Mission Veng leh Lallawmkima Vaphai te an inchaia. An ni pahnih hi a pian a tha a, an che rang dun hle. Chiang taka in bawh beh pawh a awm lo a. Point khat te te hmuin an in hnehtawk dun leh. A tawpah tharum ngah K.Lalbiaksanga Mission Veng chuan hnehna a chang ta.

Nute Final hmuhnawm takah Khawkhat ve ve leh training na inang Lalnuntluangi leh Lalrinawmi Kolasib te an in chai a. Lalnuntluangi hian hnehin Nute champion a ni ta a ni.

Palaihawl Chung inchaiah Champion lai Lalrinawma E.Lungdar/Excise& Narcotics Deptt. leh Jonathan Lalrinsanga Zuangtuite an inchai a. Thlahtute atanga inchai ngaina chhungkua leh thiamna ngah Jonatha a hian champion tumin bei viau mahse, Lalrinawma hian tawnhriat tam tak alo nei tawh a. Rinawma hian hnehin Palaihawl Champion a ni nawn leh ta a ni.

Nulian Champion tura inchaiah Champion lo ni thin tawh leh North East India pawha Mizoram tana Gold Medal lo la tawh tu Lalbiakdiki Lelhchhun Falkawn leh Lalmalsawmi Bawngkawn te an in chaia. Hun rei tak inchai chawlhsan tawh Biakdiki a che rang thei tawk lo. Training nei tha zawk Lalmalsawmi hian round thumnaah Biakdiki rang taka paihthluin a bawh bet zui a. Full point hmuin Nulian Champion a ni zui ta a ni.

Pate chung inchaiah Champion lai Lalchhanhima 39AR Saitual leh Vanlalruata Serchhip te an bei a. Lalchhanhima tawnhriat lo ngah tawh zawk a nihna alang. Inchai hmuhnawm tak a ni a. Vanlalruata bet zing zawk niin Lalchhanhima hian chiang takin hnehna a chang ta.

A tawp ber Palian inchaiah MWA Palian Champion lai Lalsangliana Upper Republic Excise & Narcotics Deptt. leh Philip Lalbiakchama Kanan Veng te chuan Palian Champion nih an in chuh a. Round tantirh phat atang Champion lai Lalsangliana hian a nawr nghal hle. Philip a pawh a tang thei viau. Point hmu hmasak zawk a ni nghe nghe. Kg 120 zeta rit Lalsangliana chuan round tawp dawna a chawi kanga. Philipa tan tal chhuah theih a ni lo. Lalsangliana chuan Round tinah full point hmuin Kanan Veng tlangval Philip Lalngaihawma a hneh a. Mizo Inchai Palian huang chhungah Champion a nih tawh nemngheh nan Lalsangliana chuan hnehna ban a phar nawn leh ta a ni. Philipa hi Mizo inchai huang chhungah a vawi khat inlanna nimahse ngam takin Lalsangliana a bei a. Point pawh a hmu nual nghe nghe.

Pro Wrestling ah hian Mizoram chhunga inchaimi tha 38 an fuankhawm a. Mipa 32 leh Hmeichhia 14 an ni. Pate bikah mi 10, Pate chung mi 9, Palaihawl mi 5, Palaihawl chung 6 lèh Palianah mi 2 an awm. Hmeichhe lam bikah Nute mi 6, Nulaihawl mi 4 leh Nulian 4 an inchai bawk a ni.