06 Jun 2019 12:48

inkhel

Mizoram Tug of War team lawmpuina hun hmang

12th Open Senior India National Tug of War Championship 2019 (Mens & Womens 4+4) a Bronze medal latu Mizoram Tug of War team lawmpuina hun chu June ni 6, Ningani chawhma dar 11:00 khan infiammite inpui, MSSC Office-ah Mizoram State Sports Council chuan a buatsaih.

May ni 29-30, 2019 chhung khan Kathmandu, Nepal ah Tug of war national championship hi neih a ni a, Tug of war Federation India leh Nepal Tug of war Federation te buatsaih a ni. Mizoram team hi semifinal-ah an chak lo a, pathumna inchuhnaah Karnataka hnehin Bronze medal an dawng.

National championship ah hian Nepal nen an vaiin state 9 an tel a, Mizoram team hian June 3, Thawhtanni khan Aizawl an lo thleng a ni.

Mizoram team lawmpuina hunah hian Pu.H.Lalzirliana, MLA, Mizoram Volleyball Association president ni bawk chu khual lian a ni a, " Mizo takin a changkan theih a, hnam dang tih theih hi Mizoten kan ti ve thei a ni" a ti.

Khual lian chuan, " Hmanah chuan kan kal hlat poh leh kan chak lo hla a, tunah erawh hmasawnna chak tak avangin hlawhtlinna.kan chhar mawlh mawlh thei tawh a. Kan kal hlat poh leh kan chak hla ve tawh. Sports ah kan changkang tan mek a ni" a ti.

"Thalaite khawvel kan tih rualin kum upa lamten Mizoram tan medal an rawn hawn thei hi a ropui a, a hlu takzet a ni. Hei hian sports ropui zia a lantir a, an chhung leh khat chauh ni lo, Mizoram sawrkar, ram mipuiin kan lawmpui a ni" a ti bawk.

Mizoram Tug of War Association President Pu VL Zaithanzama, MLA pawhin thu sawiin, Medal latute hi Tug of war Association hruaitu, executive member chin an ni a, kan tan chuan a hlu zual em em a. National championship ni si, Nepal atanga medal kan hawn thei hi keini pawl tan chuan a ropui zual hle a ni a ti ve bawk.

Mizoram team medal lawmpuina hun hi Pu C.Laltlanthanga, Secretary, Mizoram State Sports Council chuan a kaihruai a, a tih thin dan players leh team official te hnenah lawmpuina thilpek a hlan leh theuh a ni.

(adsbygoogle = window.adsbygoogle || []).push({});