National Sub Junior Football Championship for Girls, Cuttack, Odisha-a khelh mekah Mizoram team chuan May ni 22, 2015 (Zirtawpni) khan semi final-ah 2-1 in Jharkhand an hneh a, final an lut ta. Mizoram hian final-ah Bihar hnehtu Haryana an tum dawn a ni.

Khaw lum tak karah Mizoram hian Barabati Stadium-ah hnehna an chang hram a, first half-ah Mizoram hian goal hnih khungin, Offee Lalhmingchhuanpuii chuan minute 10 an khelh tlin hma hretin goal hmahruai Mizoram tan a khung a. First half tawp dawn minute 7 la awmin B Vanlalhriati chuan goal hnihna Mizoram tan a khung leh a ni.

Pathianni hian Mizoram team hian Haryana final-ah an hmachhawn dawn a, Odhisa-ah hian khua a lum em em a, inkhelh chu sawi loh, awm mai mai pawh hrehawm khawpin a lum. Odhisa-a awm Mizote chuan 44' a kai chang a awm nual tiin inkhel.com an hrilh a ni. Hengte a nih avang hian Mizoram tleirawlte hian harsatna an tawk nasa hle a, heti chung hian final an lut ta a ni.

Odhisa-a Mizo awm ten Mizoram team hi an tawiawm tha hle a, Mizoram manager Lalnunsanga chuan an huphurh ber Odhisa an hneh tawh avangin champion thei dinhmunah an din thu a sawi rualin khaw awmdan avangin harsatna lian tham an tawh a hlauh thu a sawi. Mizoram team an champion theih nan Mizo ten theih tawpin kan tawngtaipui dawn nia.