Mizoram tana medal rawn hawnte pualinJune ni 19, Nilaini chawhma dar 11:00 khan infiammite inpuiah Mizoram state sports council chuan lawmpuina hun a buatsaih.
June 7-9, 2019 chhungin idemitsu Honda India Talent Cup Round One chu Coimbatore, Tamil Nadu ah neih a ni a, Mizo rider Lalnunsanga chuan race 2 ah gold medal a dawng a, Lalrinzuala chuan race 1 ah silver a dawng ve bawk.
June 15-17, 2019 chhung khan All India Seikokai National Karate Championship chu Guwahato, Assam ah neih a ni a, Mizoram Karate team chuan gold 6, silver 1 leh bronze 10 an dawng.
Tin, June 10-13, 2019 chhung khan KAI Sub Junior & Senior National Karate Championship chu New Delhi ah June 10-13, 2019 chhungin khelh a ni bawk a, Mizoram team chuan silver 2 leh bronze 2 an dawng ve bawk a ni.
Mizoram Karate team pahnih leh Mizo rider pahnihte medal lawmna huna khual lian Dr.Lalrinchhana, Dy.Adviser, Planning & Programme Implementation Deptt. chuan, ' Nu leh pa te kan thanharh a ngai a, kan fate kan luhchilh tir tawh a nih chuan an hlawhtlin hma chu bansan lova, theihtawpa kan buaipui a ngai. Vawi hnih khat hlawhchham vanga beidawnpui loh tur a ni" a ti.
Khual lian chuan ' Infiamna ti chungin zirna hi kan hlamchhiah tur a ni lova, tawng thiam hi hlawhtlinn bul pakhat a ni. Player te hian vision kan nei tur a ni a, tum nei lo, a kahpaha ti tan a hlawhtlin tak tak theih loh a ni a ti. Sports hi a ropuina em em chu kan hlawhtlinna hi ram hlawhtlinna a ni zel a, hei hi infiammite vanneihna a ni" a ti bawk.
Medal lawmna hun hi James Lalramnghaka, AE, MSSC chuan a kaihruai a, he huna report petu Mizoram MotorSports Association Gen.Secy Joseph C.V.L. Ringngheta chuan an rider te fehchhuahna tur Mizoram State SportS Council ten an ngaihtuahsak thin avangin lawmthu an sawi a, sum leh paia nasa taka puitu Zote Honda, Aizawl Honda Dealers chungah lawmthu sawi bawkin an kal leh zelna turah pawh an chungah beiseina sang tak an nghah thu a sawi. Kum 2019 a inelna an hmachhawn mekah an naute an chetha zela nih chuan Asia mai bakah khawvel huap inelna lian leh sang zawkah an tel thuai theih thu a sawi.
Mizoram Karate team hruaitu Sensei H.Lalfangzauva pawhin report pein hlawhtlinna.an chan theihna tura theihtawp chhuahtu, players, nu leh pa bakah sum leh pai tumsaktu MSSC chungah lawmthu a sawi ve bawk.
Medal latu players leh riders zawng zawngte hnenah a tih thin danin Mizoram State Sports Council chuan lawmpuina thilpek a hlan leh theuh a ni.