35th National Junior & Senior Taekwondo Championship, 16th - 18th December 2015-a Cuttuck, Odhisa a zawh takah Mizoram chuan Gold 1, Silver 2 leh Bronze 5 an la.
Mizoram tana Gold medal hlawhchhuaktu hi F.Lalrempuii niin a tumpui te hi a hneh thei hle a. Point gap (point inthlauh avanga chaka puan) leh Knock out hmangin a chak deuh vek a ni. 1st Match-ah Haryana nen intumin 15 - 2 in a hneh a, Quarter finalah 14 -1 in Punjab a hnehin a hneh leh a, Semi finalah Asian Bronze medalist Utterakhan mi chu 12-3 a hnehin a chak zui leh bawk. Finalah hian Maharastra Champion leh international Player Swati nen in tumin an inhneh tawk hle a. 1st Round ah Maharastra nula hian 3-2 in hma a hruai a. 2nd round a Rempuii hian a game thlakin lehthal ngei a tum a. Maharastra nula awma nalh taka a back kick-a chu tuar zo lovin, a knock out ta a ni. Rempuii hian kum 5 chhung Under 67kg ah a champion ta a ni.
Silver medal latu junior Under 45kg a khel Zohmingthanga Bilkhawthlir chuan 13-5 in Sikkim a hneh a, 2nd match-ah Services tumin 11-5 in a hneh leh a. Quarter final-ah Nagaland a Knock Out thung a. Semi final-ah Manipur tumin 7-5 in a chak leh a, Finalah hian Utterakhan nen intumin 10-21 in a chak zo ta lo a ni. Naom Lalbiakpuii, Hlimen chuan Junior under 59kg ah silver medal a la bawk a. 1st match-ah 28-14 in West Bengal a hneh a, Quarter finalah 20-11 in Karnataka a hneh leh a. Semi Finalah Maharatra tum lehin 22-9 in a hneh zui leh a. Final ah hian International player Manipur nula nen intumin hun pangaia 12-12 a an inhneh tawk hnuah sudden death ah a vanduai zawkah a tang ta a ni.
Senior under 57kg a khel,.Lalmuansangi Khawzawl, National Games Bronze medalist chuan Bronze medal a la leh a, kum thum chhung a zawna Broze medal alakna a ni. National Games Bronze Medalist bawk, Ramthar veng nula Kaplianzawni chuan Junior under 46kg ah Bronze a la bawk. Junior under 55kg a khel Ruthi Lalneihhlui Lunglei chuan Bronze medal a la bawk.Zonunthari Bilkhawthlir Junior under 44kg leh under 68kg a khel Ramdinmawii Zuangtui te pawhin Semi final-ah an tumpuite lakah chak zo lovin Bronze medal an la bawk.
Medal latute hi SAI, Aizawl zirlai vek an ni. Coach Joseph Lalsiama chuan Mizoram player te hi an khel tha tlangpui a. Hei aia tha zawk result nei thei dinhmunah an din thu sawiin tharum leh thiamna chuan rual an pawl viau a, hun tawp lam an la hmang thiam tawk loh thu a sawi. Medal la phalo te pawh hian quarter final an tleng deuh vek a, Gold leh Silver medalist bakah MRP Player C.Vanlalhuma, H.Vanlalhriata, PC VL Remtluanga te leh Johny Vanlalruatsanga te pawh uihawm takin quater finalah tla mahse an khelh that avangin SAF Games 2016 a khel tur zawnna(selection) khel tura koh tel an nih thu a sawi bawk.
He Championship ah hian Services atanga khel V.Lalrinhlua,Armed Veng leh C.Lalzuitluanga Mission Vengtlang te pawhin gold medal an pet chhuak bawk a. State 32 atangin player 1150 ten he inelna hi an hmachhawn.
Mizoam tana medal latute:
1. F.Lalrempuii(Khawzawl/SAI), Senior Under 67kg - Gold
2. Zohmingthanga(Bilkhawthlir/SAI), Junior Under 45kg - Silver
3. Naom Lalbiakpuii (Hlimen/SAI), Junior Under 59kg - Silver
4. F.Lalmuansangi (Khawzawl/SAI), Senior under 57kg - Bronze
5. Kaplianzawni(Ramthar Veng/SAI), Junior under 46kg - Bronze
6. Ruthi Lalneihhlui(Lunglei/SAI), Junior under 55kg - Bronze
7. Zonunthari(Bilkhawthlir/SAI), Junior under 44kg - Bronze
8. Ramdinmawii(Zuangtui/SAI), Junior under 68kg - Bronze
Coach - Joseph Lalsiama, Electric Veng/SYS
Coach Suman Kumar, SAI Coach