07 Jun 2019 12:31

inkhel

Mizoram Taekwondo Team lawmpuina hun hmang

19th WTSKF International Karate Championship 2019 a medal 27 latu Mizoram Taekwondo Team lawmpuina hun vawiin chawhma dar 11:00 khan infiammite inpui, Mizoram State Sports Council Office. Upper Khatlaah Pu VL Zaithanzama, MLA hovin neih a ni.

May 19-23, 2019 chhung khan Panaji, Goa-ah Karate Championship hi neih a ni a, Mizoram chuan individual leh team inelna atangin, a vaiin gold medal 11 an dawng a, silver medal 7 leh bronze medal 9 an dawng bawk.

Ram dang atangin Sri Lanka, Canada leh UAE atangin an tel thei a, India ram state hrang hrang atanga telte nen an vaiin players 606 he championship-ah hian an tel a ni.

Championship neih hma hian Canada Grand Master kaihhruaina hnuaia training camp an neih thu Mizoram team coach Hmingthangvunga chuan a sawi a, ram pawn atangin tel thahnem lo mahse a tel chhun an that avangin a nauten inbeihna hautak an hmachhawn thu a sawi.

Karate team lawmpuina huna khual lian Pu VL Zaithanzama chuan ruihhlo leh thil dang avangin Mizoram in harsatna namen lo kan tawk a, kan thalaite an thi zawih zawih reng mai a. Tun hma chuan hmeichhe dinhmun chawisan kan thupui thin a, tunah chuan mipate hian chhan kan ngai tawh zawk mahin a lang tiin Mizoram tana.medal latute chu Mizo Hero ni tura a hual thu a sawi.

Khual lian chuan, Karate team medal zozai hi a ropui ka ti a, ram tan in lak avangin keini pawhin medal kan lo la ve tihna a ni a, kum 2020 Olympic ah Mizo leh India tihmingthatu kan lo beisei dawn a ni a ti bawk.

Mizoram Karate team.medal lawmna hun hi Pu Rosangliana, Administrative Officer, MSSC in a kaihruai a, medal late leh team official te.hnenah a tih thin danin MSSC chuan thilpek a hlan leh theuh a ni