Mizoram pum huap infiamna kutpui Mizoram State Games 2019 chu December ni 9, Thawhtanni khan khuallian Chief Minister Pu Zoramthanga chuan Rajiv Gandhi Stadium, Mualpuiah a hawng. State Games hawnna inkhawm hi Chief Secretary Pu Lalnunmawia Chuaungo chuan a kaihhruai.

He infiamna hi December ni 9 - atanga ni 13 chhung hian Aizawl a infiamna hmunhma hrang hrangah inelna neih a ni ang.  Hawnna inkhawmah hian Deputy Chief Minister Pu Tawnluia chu khualzahawm niin, Sports and Youth Services Minister Pu Robert Romawia Royte chu uaptu a ni.

Chief Minister chuan kum tam tak hnu ah State Games chhunzawm a ni leh thei chu lawmawm a tih thu a sawi a. State Games nei thei state nih chu a hlut thu sawiin, a thatna leh hlutna kan la hmu dawn chauh a ni, a ti. Chief Minister chuan kawng hrang hrangah Mizoram chuan hmasawn tura hma la in, development-ah hmahruai kan tum mek thu a sawi a. Sports lamah pawh India ram state dangte entawn turin discipline hrang hranga hmahruaitu nih tumna rilru pu chungin tun infiammite chu theihtawp chhuah a khel turin a chah a. Mizoram State Games ropui leh hlawhtling tak nei thei turin duhsakna a hlan a ni.

Sports and Youth Services Minister Pu Robert Romawia Royte chuan State Games chu Mizoramin sports discipline hrang hranga hma a sawn belh theihna tur nia a beisei thu sawiin, games neih chhungin players then theihtawp chhuah a, mipuite pawhin phur taka an tawiawm a beisei thu a sawi a ni.

State Games hawnnaah hian Chief Minister chuan Games Flag pawhparh in, Mizoram NCC Air Squadron ten Airshow an entir a. Players ten Games neih chhung hian infiammi dik tak rilru pu a, dan leh kaihhruaina te zawm a, infiamna tha tak nei turin intiamna thu an sawirual a ni.