14 Nov 2019 04:56

inkhel

Mizoram Police FC leh Chhinga Veng FC chak zawk an awm lo

Mizoram Premier League (MPL) Season 8 khelh mekah round 12 chu AR Lammualah Pawl Kut an hman avangin Rajiv Gandhi Stadium Mualpuiah November ni 14, Ningani match hmasa ber khelh a ni a, Chianga Veng FC leh Mizoram Police FC te chak zawk awmlo in 1-1 in an inhneh tawk a, point 1 ve ve an hlawh chhuak. He inkhelah hian Chhinga Veng FC defender Lalmawizuala chu Man of the match-ah thlan a ni.

Team pahnihte hi Kolasib khelmualah in tawngtawhin Chhinga Veng FC hian 2-1 in anhneh a, an intawn vawihnihnaah erawh chak zawk awmlo in an inhneh tawk. Mizoram Police FC hian point 22 neiin pahnihna an nih chhunzawm a, Chhinga Veng FC hian point 21 neiin pathumna nih chhunzawm bawk.

Goal lut te hi first hlaf leh second half-a lut an ni a, first half-ah Chhinga Veng tan MC Malsawmzuala goal khung chu second half-ah Mizoram Police tan Lalfakzuala chuan an siphurh a rul.

02:00 PM Chhinga Veng FC 1-1 Mizoram Police FC

(MC Malsawmzuala 5') (Lalfakzuala 64')

MoM: Lalmawizuala, Chianga Veng FC

First half-ah goal khat a lut a, Chhinga Veng FC chuan an hun tha neih hmang tangkai nghalin minute 5-ah forward MC Malsawmzuala'n freekick atangin goal hmahruai Khung. Chianga Veng chuan goal thun belhna hun tha nei zuiin midfielder Thasiama ball pek luh chu forward MC Malsawmzuala chuan goal kham a tauh per hlauh.

Police pawhin an siphurh sut ngei tumin annawr ve bawk. Forward Lalnunsanga'n (Talea) box pawn chiah atanga apet chu a goal dawn nia alan laiin goal kham a fuh a, Chhinga Veng an him hram. First half huntawp dawnah Chhinga Veng chuan goal thun belhna hun neiin C Malsawmzuala'n Police keeper Muanawma chiah a hmachhawn hnuah goal sirah apet a, goal luh belh lo in Chhinga Veng chuan 1-0 a hmahruaiin chawlhlawk an hmang.

Second half-ah team pahnih te an innawr tawn zak zak hnuah Police chuan anhun tha neih hmangtangkaiin minute 64-ah forwar Malsawmfela ball pek tha zet chu Lalfakzuala chuan box pawn chiah atangin an siphurh sutna goal a khung.

Team pahnih te an innawr tawn leh zak zak a, Police chuan goal thun belhna hun tha neiin F Lalrinpuia ball pek Sangbera shot chu Chhinga Veng keeper Dharminder Guru chuan a dan sak. Huntawp dawnah Chhinga Veng pawhin goal thun belhna hun neiin bench atanga lut state pawn player Quattara Sie shot tha zet chu Police defender Lalhmunmawia chuan a dang hman hluah. Goal luh belh tawh lo in 1-1 a inhneh tawkin khelmual an chhuah san ta a ni.

November ni 21, Ninganiah round 13-na khelh tan a ni ang a, tlai dar 4:00-ah :Chhinga Veng FC hian Electric Veng FC an hmachhawn ang a, zan dar 7:00-ah Mizoram Police FC hian Ramhlun North FC hian an hmachhawn ang.

(adsbygoogle = window.adsbygoogle || []).push({});