Mizoram Police FC chuan 5-1 laiin Ramhlun North FC an sawp a, Mc Dowell's No 1 Soda Mizoram Premier League (MPL) Season 7 Round 4 match September ni 26, Nilaini tlaia khelhah hian Mizoram Police FC forward F. Lalrinpuia (Valpuia) chu Man of the match-ah thlan a ni.

First half-ah goal hnih a lut a, second half-ah goal li a lut hem mai. Mizoram Police FC tan F. Lalrinpuia chuan goal hnih a khung a, Lalbiakhlua, Lalramtharmawia leh Lalfakzuala ten goal khat theuh an khung bawk. Ramhlun North FC tan Waheed Adekunle chuan goal khat a khung ve bawk.

Mizoram Police FC hian Bethlehem Vengthlang FC leh Electric Veng FC an hneh hnuah Aizawl FC an hneh lo a, Ramhlun North FC lakah erawh chetsual nawn an tum lo, khelh tawhah point 9 an nei tawh a ni. Ramhlun North FC hian Chanmari FC an hneh loh hnuah Chawnpui FC an draw a, Chhinga Veng FC leh Mizoram Police FC an hneh lo leh a, khelh tawhah point 1 chiah an la hlawhchhuak

Ramhlun North FC 1-5 Mizoram Police FC

(Waheed Adekunle 86') (F Lalrinpuia 21', 57', Lalbiakhlua 27', Lalramtharmawia 72', Lalfakzuala 83')

MoM: F. Lalrinpuia, Mizoram Police FC

Inkhel tan a ni a, Mizoram Police FC chuan goal hlauhawm nei nghalin Fakawma chuan chance tha a thleh nghal pang, darkar chanve an khelh tlin hmain Mizoram Police FC chuan goal hnih an khung. Mual dinglam sir atanga Lalbiakhlua (Biaktea) ball vawrh luh tha zet chu box chhunga awm F. Lalrinpuia (Valpuia) chuan a pet goal hnuah V. Laltanpuia (Tria) ball vawrh luh tha zet chu Lalbiakhlua (Biaktea) chuan a pet goal ve leh, minute 27 chhungin si hnih faiin Mizoram Police FC chuan hma an hruai.

Ramhlun North FC pawhin goal thunna hun tha nei ve bawkin Liberian midfielder Waheed Adekunle chuan goal kham a pet per a, Dingngheta pawhin chance tha em em a thelh bawk. Goal luh belh loin half time a nih chuan Mizoram Police FC chuan 2-0 in hma an hruai.

Second half tan a ni a, Mizoram Police FC chuan inkhel thunun chhunzawmin minute 57-ah mual veilam sir atanga Fakawma ball pek tha zet chu box chhunga awm F. Lalrinpuia (Valpuia) chuan mawi takin a tauh lut a, si thum faiin Mizoram Police FC chuan hma an hruai ta.

Mizoram Police FC chuan nawr chhunzawmin minute 11 chhungin goal hnih dang an khung belh leh a, bench atanga lut Fakzuala leh Lalramtharmawia te chuan goal khat ve ve an khung zui leh bawk. Hun tawp dawn minute 4 ala awmin Ramhlun North FC tan Liberian midfielder Waheed Adekunle chuan goal khung ve bawk mahse an siphurh sut turin theihna an nei tawh lo, hun a tawp a, Mizoram Police FC chuan 5-1 a hnehna changin point 3 an hlawh chhuak ta a ni.