Mizoram Premier League (MPL) Season 8 khelh mekah November ni 21, Ningani zan round 13 match hnihna semifinal lut chiang tawh Mizoram Police FC leh relegate thei dinhmuna ding mek Ramhlun North FC inkhelah Mizoram Police FC chuan 2-1 Ramhlun North FC hnehin point 3 an hlawj chhuak. He inkhelah hian Mizoram Police FC midfielder R Malsawmtluanga chu Man of the match-ah thlan a ni.

Team pahnihte hi round 4-ah in tawngtawhin Mizoram Police FC hian 4-1 in anhneh a, an intawn vawihnihnaah pawh Mizoram Police FC bawk chungnung zawkah an tang. Mizoram Police FC hian point 25 neiin pahnihna an nih chhunzawm a, Ramhlun North FC hian point 9 neiin pasarihna an ni mek. Chawnpui FC aiin point 1-in an sang hret a, November ni 28, Ningani tlai dar 4:00-ah Chanmari FC nen an match hnuhnung ber an khel ang a, an dinhmun tur chinfel ani tawh ang.

07:00 PM Mizoram Police FC 2-1 Ramhlun North FC

(Malsawmfela 10', Lalfakzuala 11') (PC Lalruatpuia 14')

MoM: R Malsawmtluanga, Mizoram Police FC

First half-ah goal thum lai alut a, Mizoram Police chuan inkhel thunun nghalin minute 4 chhungin goal thum a lut hman. Goal hmasa ber hi inkhel tan atanga minute 10-ah Police tan winger Lalbiakhlua (Biaktea) ball pek chu forward Sawmfela'n a tauh lut a, Fakzuala'n an goal hnih a thun zui nghal zat bawk. Ramhlun North pawhin an hun tha neih hmang tangkaiin minute 14-ah midfielder Lalruatpuia'n an siphurh a sut then ve bawk.

Police chuan inkhel thunun chhunzawmin goal thun belhna hun tha vawihnih nei zui mahse Lalbiakhlua (Biaktea) leh Fakzuala'n an hun tha neih an hmang tangkai thei lo a, Police chuan 2-1 hmahruiin chawlhlawk an hmang.

Second half-ah goal aluh belh lo a, Police chuan inkhel thunun zawkin goal hlauhawm an nei nual a, mual dinglam sir atanga Sawmfela ball pek chu midfielder Laldawngliana chuan goal-ah a chantir thei lo a, bench atanga lut F Lalrinpuia (Valpuia) chuan a hun tha a hloh zui bawk.

Second half huntawp dawnah police chuan goal thun belhna hun tha neiin box chhung chiah atangin Fakzuala'n goal ban a petper a, Ramhlun North pawhin goal thun belhna hun tha nei ve bawkin defender Lalnunzira chuan goal ban apetper ve bawk. Goal luh belh lo in Police chuan 2-1 in hnehna an chang zui ta a ni.

(adsbygoogle = window.adsbygoogle || []).push({});