October ni 30, Thawhlehni zan Mc Dowell's No 1 Soda Mizoram Premier League (MPL) Season 7 Round 10 match hnihna Champion lai Chhinga Veng FC leh Mizoram Police FC inkhelah Mizoram Police FC chuan 2-1 in Chhinga Veng FC an hneh. He inkhelah hian Mizoram Police FC goalkeeper F. Lalmuanawma chu Man of the match-ah thlan a ni.

Team pahnih te hi round 5-ah inhmachhawn tawhin Chhinga Veng FC hian 1-0 in anhneh a, an intawn vawihnihnaah erawh Mizoram Police FC an chungnung zawk. Khelh tawhah Mizoram Police FC hian point 15 neiin palina an ni mek a, semifinal khelh beiseina an nei thar zel. Chhinga Veng FC hian point 23 neiin hmahruaitu an ni mek bawk.

Champion lai Chhinga Veng FC hian foreigner an lak thar Ivorian forward Gatch Diomande chu an chhawr a, attacking game khelin an che a rang a, inkhel a hmuhnawm hle. Mizoram Police FC pawhin attacking game tho khelin training lai Malsawmfela leh R. Malsawmtluanga chu an chhawr a hnehna changin tun season-ah Chhinga Veng FC hneh hmasa ber awm chhun an ni.

Chhinga Veng FC 1-2 Mizoram Police FC

(MS Dawngliana 13') (B. Zoramthara 6', Lalbiakhlua 80')

MoM: F. Lalmuanawma, Mizoram Police FC

First half-ah Mizoram Police FC tan B. Zoramthara chuan an hmahruaina goal a khung chu Chhinga Veng FC tan MS Dawngliana chuan an siphurh a rul a, Ssecond half-ah Mizoram Police FC tan Lalbiakhlua (Biaktea) chuan an chakna goal a khung.

Inkhel tan a ni a, goal lut hmasa ber hi minute 6-a lut a ni a, Mizoram Police FC tan R. Malsawmtluanga freekick tha zet chu box chhunga awm B. Zoramthara chuan mawi takin a tauh lut. Chhinga Veng FC chuan nawr letin minute 13-ah mual veilam sir a tang a Hmingthanmawia ball vawrh luh tha zet chu MS Dawngliana chuan chiang zeta pet lutin an siphurh a rul.

Chhinga Veng FC chuan goal thun belhna hun tha neiin box pawn chiah a tang a hmingthanmawia shot tha zet chu a goal dawn nia a lan laiin goal kham chungah chiah a kal a, Rinchhana corner pet tha zet chu Vanlalchhuanga chuan goal kham chungah chiah a tauh bawk. Mizoram Police FC pawhin goal thun belh ngei tumin nawr mahse Sawmfela leh Fakzuala chuan hunawl an nei thei bik lo a, 1-1 a in hneh tawkin chawlhlawk an hmang zui ta a ni.

Second half-ah Mizoram Police FC chuan goal thun belh ngei tumin coach Lalbialsanga Colney chuan F. Lalrinpuia (Valpuia), Lalbiakhlua leh Joseph Lalnunpuia te luh tirin an goal bawh ana sawt. Mahse goal erawh an thun mai thei bik lo a, Chhinga Veng FC pawhin goal thun belhna hun tha neiin MS Dawngliana chuan Mizoram Police FC keeper Muanawma chuah a hmachhawn hnuah goal kham chungah a pet.

Mizoram Police FC chuan minute 80-ah an hun tha neih an hmang tangkaiin Lalbiakhlua (Biaktea) chuan hnai tak atangin an goal hnihna a khung. Chhinga Veng FC chuan huntawp dawnah an siphurh sutna hun tha neiin Romawia freekick tha zet leh Rinchhana shot tha zet chu Mizoram Police FC keeper Muanawma chuan a dan sak ve ve a, Mizoram Police FC chuan 2-1 in hnehna an chang zui ta a ni.

(adsbygoogle = window.adsbygoogle || []).push({});