October ni 18, Ningani zan Mc Dowell's No 1 Soda Mizoram Premier League (MPL) Season 7 Round 8 match hnuhnung ber Mizoram Police FC leh Chanmari FC inkhelah Mizoram Police FC chuan sihnih fai a Chanmari FC hnehin point thum an hlawh chhuak. He inkhelah hian Mizoram Police FC goalkeeper F. Lalmuanawma chu Man of the match-ah thlan a ni.

Goal lut te hi first half-ah leh second half-a lut an ni a, Mizoram Police FC tan R. Malsawmtluanga leh Lalfakzuala chuan goal khat ve ve an khung a ni. Team pahnih te hi Round 6-ah in hmachhawn tawhin Chanmari FC hian 1-0 in anhneh a, an intawn vawihnihnaah erawh Mizoram Police FC an chung nung zawk a ni. Mizoram Police FC hian point 12 neiin a sang pali zingah an awm a, semifinal khel turin beiseina an nei thar bawk.

Mizoram Police FC 2-0 Chanmari FC

(R. Malsawmtluanga 39', Lalfakzuala 56')

MoM: F. Lalmuanawma, Mizoram Police FC

Inkhel tan a ni a, Mizoram Police FC chuan nawr nghalin goal thunna hun tha an nei nghal a, Sawmfela ball pek Fakzuala shot chu a goal ngei dawn nia alan laiin Chanmari FC keeper MS Dawngliana chuan a dang hman.

Chanmari FC pawhin nawr letin goal thunna hun tha an nei a, Jeremy Laldinpuia shot tha zet chu Mizoram Police FC keeper Muanawma chuan a dan sak hnuah box chhung a tang a Muanzova shot chu Mizoram Police FC keeper Muanawma chuan a dan sak bawk.

Goal lut lo in chawlh lawk an hmang dawn emaw tih hnu huntawp nan minute 6 ala awmin Sawmfela ball pek tha zet chu box pawn chiah atangin R.Malsawmtluanga chuan Chanmari FC keeper MS Dawngliana vei lam sir kilah mawi tak a pet goal-in an hmahruaina a khung a, Mizoram Police FC chuan 1-0 a hmahruaiin chawlh lawk an hmang zui ta a ni.

Second half tan a ni a, Mizoram Police FC chuan inkhel an thunun nghal a, minute 56-ah Lalfakzuala chuan goal a khung ve leh a, Police chuan sihnih faiin hmaanhruai zui ta a ni. Chanmari FC chuan an siphurh sut ngei tumin Coach Chawngthansanga chuan Lalnunzama, Mark Zothanpuia leh Vanlalbiaa Chhangte luh tirin an goal bawh a nasawt a, Jeremy Laldinpuia'n box pawn chiah atangin goal kham a pet per a, mual veilam sir a tang a, Jeremy Laldinpuia ball vawrh luh MC Malsawmzuala shot chu goal sirah chiah a kal zui bawk.

Huntawp dawnah Chanmari FC chuan goal thunna hun tha neiin Rochhingpuia Volley chu goal ngei dawnin lang mahse Mizoram Police FC keeper Muanawma chuan a dang hman. Goal luh belh tawh lo in Mizoram Police FC chuan 2-0 in hnehna an chang ta a ni.

(adsbygoogle = window.adsbygoogle || []).push({});