November ni 9, Zirtawpni tlai Mc Dowell's No 1 Soda Mizoram Premier League (MPL) Season 7 Round 12 match vawi thumna Bethlehem Vengthlang FC leh Mizoram Police FC inkhelah Mizoram Police chuan 4-0 in Bethlehem Vengthlang an sawp. He inkhelah hian Mizoram Police FC forward Lalfakzuala chu Man of the match-ah thlan a ni.
Mizoram Police tan Lalfakzuala chuan goal hnih a khung a, Lalruatpuia leh Lalbiakhlua (Biaktea) chuan goal khat ve ve an khung. Team pahnih te hi round 1-ah inhmachhawn tawhin Mizoram Police hian 1-0 in anhneh a, an intawn vawihnihnaah pawh Mizoram Police bawk an chungnung zawk.
Mizoram Police FC hian an match hnuhnung berah Champion lai Chhinga Veng FC 2-1 in anhneh a, Semifinal khelh ngei tumin training lai Malsawmfela leh R. Malsawmtluanga ten inkhel bul an tan a, hnehna an chang. Khelh tawhah point 18 neiin pathumna an hauh mek a, semifinal khel turin an dinhmun an siam tha zel a ni.
Bethlehem Vengthlang FC hian relegate pumpelh tumin an match hnuhnung pahnihah Electric Veng leh Chawnpui an hneh hnuah Mizoram Police an hneh lo a, point 8 neiin amawngphah an luah lum mek a, dinhmun harsa takah an din mek.
02:30 PM Bethlehem Vengthlang FC 0-4 Mizoram Police FC
(Lalfakzuala 8', 52', Lalruatpuia 34', Lalbiakhlua 65')
MoM: Lalfakzuala, Mizoram Police FC
Inkhel tan a ni a, Mizoram Police chuan inkhel thunun nghalin minute 8-na lekah goal an khung nghal a, he goal hi Lalfakzuala khung a ni. Bethlehem Vengthlang FC chuan nawr letin Lalmuanzova leh T. Shalomlala chuan Mizoram Police tlarhnung an paltlang thei lo.
Mizoram Police chuan minute 34-ah anhun tha neih hmangtangkaiin mual dinglam sir a tang a Lalbiakhlua (Biaktea) ball vawrh luh tha zet chu box chhunga awm Lalruatpuia chuan chiang zetin an goal hnihna a khung.
Mizoram Police chuan first half huntawp dawnah goal thun belhna hun neiin box chhung chiah a tang a V. Laltanpuia (Tri-a) shot tha zet chu Bethlehem Vengthlang FC keeper Lalhmaa chuan a dan sak a, Mizoram Police chuan 2-0 a hmahruaiin chawlhlawk an hmang zui ta a ni.
Second half-ah Mizoram Police chuan inkhel thunnun chhunzawmin minute 52-ah V. Laltanpuia ball pek tha zet chu Lalfakzuala chuan box-ah lalutin mawi takin an goal thumna a khung leh ta a ni. Minute 65-ah Mizoram Police chuan an hun tha neih hmang tangkai leh in mual dinglam sir a tang a Lalfakzuala ball vawrh luh chu Lalbiakhlua (Biaktea) chuan mawi tak a tauh lutin an goal lina a khung leh ta a ni.
Huntawp dawnah Bethlehem Vengthlang chuan goal thunna hun tha neiin box pawn chiah a tang a PC Vanlalhruaia shot tha zet chu Mazoram Police keeper Muanawma chuan a dan sak a, goal luh belh tawh lo in Mizoram Police chuan 4-0 in hnehna an chang zui ta a ni.
(adsbygoogle = window.adsbygoogle || []).push({});