Mizoram MMA team an che tha

25th September 2018, 01:09AM

New Delhi khawpuia AIMMAA National Mixed Martial Arts Championship neih zawh takah Mizoram aiawha MISMA (Mizoram State MMA Association) in fighter 16 an tirhte chuan gold medal 5, silver 3 leh bronze 1 an la.

National Mixed Martial Arts Championship hi September 21 atanga September 24 chhung khan New Delhi-ah an nei a. National Championship a nih rual hian 2018 World Championship a India ram aiawha tel tur thlanna a ni nghal a, India ram aiawh tur hian Mizo fighter pahnih pawh an thlang a ni.

Mizo fighter pahnih - Pathianmalsawmdawngliana (56.7 kg) leh Lalvenhimi (52.2 kg) te chu India aiawh tur hian an thlan bakah Referee & Judge atan Samuel Lalrozama chu thlan a ni bawk a. Tun tuma World Championship lo awm tur hi a vawi khatna atan khawvela pro MMA company lian pahnih - UFC leh M1Global te support-na hnuaia neih tur a ni.

National Championship-ah hian kum khat chhung atana national ranking siam nghal a ni a, Mizo fighter zingah rank nei pha pathum an awm a. Lalvenhimi chu straw weight-ah pakhatna a ni a, Pathianmalsawmdawngliana chu flyweight-ah pakhatna niin, flyweight-ah vek hian Lalropuia chu pahnihna a ni.

Mizoram team te’n National Championship-a medal an lak dan chu Lalvenhimi, Bethlehem Vengthlang (DCS) chuan gold medal a la a; Pathianmalsawmdawngliana, Kawrtethawveng (Elon) chuan gold a la bawk a. K. Vanhnuaithanga, East Lungdar (DCS) chuan gold medal a la a; Lalropuia, Mission Veng (HBK) chuan silver medal a la a; C. Lalrinpuia, Dawrpui (DCS) chuan bronze medal a la bawk.

K. Vanhnuaithanga, East Lungdar (DCS) chuan Brazilian Jiu-Jitsu ah pawh silver medal a la tel a. Under 18 lamah Lalmuanawma, Dawrpui (DCS) chuan gold medal a la a; Rovulluaia, Dawrpui Vengthar (DCS)/Mt. Carmel chuan gold a la bawk a; Ian Lalremruata, Dawrpui (DCS) chuan silver medal a la bawk a ni.

Mizoram team te hi Samuel Lalrozama, Dawrpui (Team Coach), Zorelliana, East Lungdar (Team Assistant Coach), Abisac Lalhruaitluangi, Dawrpui (Team Manager) leh Lalthakima, Mission Veng (President) te chuan an hruai a ni.

Copyright © inkhel.com 2024. All rights reserved.