Mizoram Karate Player-ten Gold medal 1 leh Silver Medal 2 an la

22nd September 2015, 06:09AM

Khawvêl pumpui Karate Sports khaikhâwmtu World Karate Federation (WKF) programme pawimawh tak mai Commonwealth Karate Championship vawi 8-na  September,18-20,  2015 chhûng khan India ram khawpui New Delhi-a Talkatora Indoor Stadium-ah neih a ni a.  He 8th Commonwealth Karate Championship 2015-ah hian ram 11 telin India ram aiawha khêl Mizoram Karate Player-ten Gold Medal 1 leh Silver Medal 2 an la a, a pumpuiah a thlengtu India chu 1st-na a ni a, 2nd-na Sri Lanka leh 3rd-na chu Australia a ni.

8th Commonwealth Karate Championship 2015-a India aiawha khel Medal latu Mizoram Karate Player-te chu hêng mîte hi an ni:-

1. Hmangaihsângpuia = GOLD MEDAL

Hmangaihsângpuia hi Pu J.C.Lalngûrliana fapa, Kawrtethawveng khua a ni a, Aizâwl SAI hmuna Karate Trainee a niin, 8th Commonwealth Karate Championship 2015-ah hian Junior Male Kumite (Fight) below 55kg category-ah a khêl a, final round-ah Sri Lanka râwlthar chhuanvâwr nên an intum a, Hmangaihsângpuia hian hnehna changin Gold Medal a la ta a ni.

2. Lalrinsânga = SILVER MEDAL

Lalrinsânga hi Pu Râlkâpthanga fapa, Phunchawng a ni a, 8th Commonwealth Karate Championship 2015-ah hian Junior Male Individual Kata (Basic Forms)-ah intihsiakna hi hmachhawnin, final round-ah Sri Lanka nên an inhmachhawn a; Lalrinsânga hi a khingpui aiin a performance a țha hle nâin, tihsual palh zeuh a neih avângin a vânduai zâwkah țangin Silver Medal a lâk phah ta a ni.

3. P.C. Vânlalruati = SILVER MEDAL

P.C. Vânlalruati hi Pu Lalbiakdika fanu, Maubâwk, Aizâwl a ni a, Aizâwl SAI hmuna Karate Trainee ni lai mêk a ni a; 8th Commonwealth Karate Championship 2015-ah hian Under 21 years Female Kumite below 55kg-ah a khêl a, India-in Gold Medal la tûra a beisei rûk zînga mi a ni ve nâin, final round-ah Malaysia ram player țha ve tak mai nên intawngin a vânduai zâwkah a țang hlauh tlat mai a, Silver Medal a la ta a ni. Tin, September 17, 2015 khan New Delhi-ah tho hian KAI Sub-Junior National Karate Championship 2015 neih a niin Mizoram Karate Team pawh an tel ve a; Lalduhsângi chuan Girls 11 years +39 kgs Kumite-ah Gold Medal a la nghe nghe bawk a ni.

8th Commonwealth Karate Championship 2015-a India ram aiawha khêlte leh Medal latu Mizoram Karate player-te, KAI Sub-Junior National Karate Championship 2015-a Medal latu te chu All Mizoram Karate Association (AMKA) chuan an chhuang hle a; kawng engkima hêng Mizo Karate Player-te buaipuitu Mizoram sawrkâr leh Mizoram State Sports Council (MSSC) chungah All Mizoram Karate Association (AMKA) chu an lâwm tak zet zet a ni tih AMKA General Headquarters President Pu R.Zomâwia chuan a sawi a, “India ram leh Mizoram tihmingțhatu zinga kan nâute Mizo thalai Karate players an tel chho ve ta zêl hi a lâwmawm kan ti a; dinhmun sâng zâwka kan nâute an invawrh chhoh zêl theihna tûrin AMKA chuan theihtâwp kan chhuah reng dâwn a ni,” Pu R.Zomâwia chuan a ti bawk.

8th Commonwealth Karate Championship 2015 leh Sub-Junior National Karate Championship 2015 khêla feh chhuak Mizoram Karate Team hi Team Manager Pu TBC Hnûna, Bethlehem Vêng, Aizâwl leh Team Coach pahnih Pu C.Hmingthangvunga, Chânmari, Aizâwl (SAI Karate Coach) leh Pu Lalramthara, Tuikual South, Aizâwl te’n hruaiin, ni 22.9.2015-ah Delhi chhuahsanin Mizoram an rawn pan ang a, ni 25.9.2015-ah Aizâwl an rawn thlen theih beisei a ni bawk.

Copyright © inkhel.com 2024. All rights reserved.