Mizoram Judo Team lo haw ten medal pasarih an hawn

15th September 2015, 09:09PM

September 3-7, 2015 chhung khan Vijayawada, Andra Pradesh-ah Sub Junior National Judo Championship neih a ni a, he championship-a tel Mizoram Judo team chuan medal pasarih an dawng.

September 14, 2015 Thawhtanni dar 11:00 khan Mizoram State Sports Council chuan Judo team lo haw te  lawmpuina hun an hmangpui a, gold medal hlawhchhuak zolo mahse, silver medal 2 leh bronze medal 5  rawn hawnin, Mizoram State Sports Council chuan Mizoram Judo team te hnenah lawmpuina thilpek a hlan.

He hun kaihruaitu Pu Lalrosanga, Administrative Officer chuan a tui tak tak leh thawkrimte tan khawvel huapa inphochhuahna a inhawng reng a, kan ei ang ei, keini aia hausa bik lo turte pawn khawvel huap inelna, Olympic, Asian Games leh Commonwealth Games-ah te medal an la thei a, mizo te pawh hian kan theih na kan lantir zel atul thu a sawi.

Pu C.Laltlanthanga, (Secretary MSSC) chuan, "Infiammite hian kan luhchilh game hi hlawhtlinpui kan tum vek tur a ni. Tun hun hi a pawimawh ber a, hmana kan nih tawh leh dawn tawhte aiin tuna kan nihna leh dinhmun hi a pawimawh zawk a. Theihtawpin Mizoram sawrkarin Sports hmasawn nan hma a la zel a, kan mamawh pawimawh tak chu regular training kan neihna tur hmun a ni. Chutiang tur chuan Sports Association hrang hrang tan hmun hma kan buatsaih mek zel a ni" a ti.

Mizoram team coach Lalrimawia chuan khaw lum avanga harsatna an tawh thu leh an duh ber Gold Medal an hlawhchhuak zo lo chu pawi a tih thu a sawi.

Medal latute:-

1. Saithangpuii, TNT +20 Kg - Silver 2. Zonunsangi, Tuirial (SAI) below 44 Kg Silver Medal 3. Laltlankimi, TNT below 44 Kg Bronze Medal 4. Lalsangliana, Muallungthu (SAI) below 50 Kg Bronze Medal 5. PC Lalhminghluna, Bunghmun-Lunglei + 55 Kg Bronze Medal 6. R.Vanlalruata, Lunglei below 55K Bronze Medal 7. Lalnunhrila, TNT below 45 Kg Bronze Medal

Manager:- Lallawmzuali, Chaltlang & Lalthansanga TNT Coach: - Lalrimawia, Aibawk & Jonathan Lalrinsanga Zuangtui

Copyright © inkhel.com 2024. All rights reserved.