Mizoram Table Tennis khawvela inelna ropui ber leh lawmman tamna ber tur Mizoram Hexa League (MHL) chu buatsaih a ni dawn ta. June ni 29, 2015 khan Mizoram Table Tennis Association (MTTA) leh Zonet Cable Network-te chuan thawhhona thuthlung (Agreement) fel tak an ziak fel ta bawk.
Inremna ang chuan Mizoram Hexa League hi MTTA-in a buatsaih ang a, Online Live broadcast a buaipui ang a, Zonet hian inkhel zawng zawng Live-in a tichhuak thung thin dawn a ni. Tin, inkhel zawng zawng hi a tukah Record tihchhuah leh vek thin a ni ang. He inremna thuthlungah hian MTTA aiawhin Pu C. Hmingthanzama, President MTTA leh Zonet aiawhin Pu R.K. Lianzuala ten hming an ziak a, hriatpuitu atan Pu Lalfakzuala Hmar, Treasurer, United Sports Association of Mizoram (USAM) leh Tv. Lalthantluanga, Zonet-te chuan hming an ziak ve bawk.
MHL hi Table Tennis game tihlar nan leh tih hmasawn nana buatsaih tur a ni a, September leh October, 2015 chhung hian Mizoram Table Tennis Hall, Mission Veng-ah khelh a ni ang. He tournament-ah hian team 6 (paruk)-ten inelna an nei ang a, team tinah hian player 6 (paruk) zel an awm dawn bawk a ni. Mizoram Hexa League-a tel tur team te hi Organising board in a rualkhai thei ang bera remkhawm an nih avangin team tinte hi inkhel tawk tak leh hmuhnawm tak tura ngaih a ni a, champion tur team pawh rinlawk harsa tak tur a ni. Thawhlehni(Tuesday) zan leh Ningani (Thursday) zan apiangin inkhelh thin a ni ang.
He tournament khel tur hian MTTA chuan Mens, Youth Boys leh Men's 35+ Category atangin rank sang mi 30 a thlang chhuak phawt a, anni bakah hian he tournament-a tel thei zawnna qualifying a buatsaih paltlang player 6 (paruk)-te nen player 36-in MHL hi an khel dawn a ni. An zingah hian India sub-junior no 1 lo ni thin David Zodinpuia te, National level-a Mizoram hming lo titha tawhtute - Isaac C. Lalsawmliana, Lalmalsawma te, Mizo zinga India Cup lo khel tawh leh awmchhun Lalremruata Ralte te, National Games-a Mizoram aiawhtute pawh an tel kim hle dawn a ni.
MHL atana inbuatsaihna hi ngawrh takin kalpui mek a ni a, League khel tur player te pawh July ni 3 hian MTTA chuan ko khawmin hemi chungchang inhrilhfiahna a neihpui dawn a ni.
MHL chhim tur hian Lalrinpuia, India TT player (men's senior rank no. 8 leh Youth no. 4), tuna zawh tak South Asian Federation Cup a gold 2 leh Silver 1 dawngtu te, India Cadet a no 1 leh 2 ni lai, Jeho Himnakulhpuingheta leh Alberto L.R. Ruata te pawh beisei an ni. Anni bakah hian India top ranked player te he League chhim tur hian sawm tum an ni bawk. Mizoram Hexa League hi Table Tennis Federation of India (TTFI) hriatpuinaa siam tur a nih avangin official te pawh lo tel ngei tura ngaih an ni a, hemi bakah hian North East State-a Association te pawh chhim tura sawm an ni ang.