Mizoram sawrkar hian lehkha zir hi ngaipawimawh em emin Sports activity zawng zawng hi khap ta selang chuan thinrim fe fe kan tam khawp ang. Lehkha zir hi keini inkhel.com chuan kan support em em, kan admin thenkhat Ph.D degree nei leh Assistant Professor ni chhunzawm ta an awm nawk a. Zirna avanga sawrkar hnaa lut leh Group A officer ni ta te pawh an awm nawk bawk.

Zirna lam hi kan ngai pawimawh em em, chutih laiin Sports lamah pawh hma sawn ila tih hi kan duh dan a ni bawk. Kum tin mi sang tel an graduate a, graduate zawng zawng tan sawrkar hna a hmuh theih mai loh, an thiamnain tlin pawh ni se sawrkar hnain a daih lo hrim hrim. Chung te a nih avang chuan a thenin Mistiri hna te an thawk a, a then an sumdawng a, a then sports lamah an kal bawk a. 

Thalai tam takin eizawnna an neih hian chhungkuain hma a sawn a, ramin hma a sawn thin.  Kum tin mi sang telin sawrkar hna thawh tumin exam an pe a, a tling chu mi 50 pawh an tling dawn em ni? Sawrkar hnain a daih miau loh chuan eizawnna tha si kawng dang pawh kan dap tel chu a ngai thin ang hian Boxing kal kawng pawh chutiang chu a ni a.

Amateur Boxing i khelh chuan i kawng tur chu State championship i paltlang ang a, National Championship-ah i tel leh thei ang a, chuta i che tha zel a nih chuan India hminga feh chhuah a ni chho dawn. Kum khatah National Championship vawi khat a awm a, chutah pawh chuan Mizo 200 chuang kan tir thei lo hrim hrim. A kal chhunte che tha viau thin mah se khingpui te Knock Out loh chuan chak chhoh zel a harsat chang a awm thin tih pawh kan hre vek awm e.

Kan boxer te hi an tha tawk lo a ni thei a, kan boxer te hi an tha tawk a, mah se judgement lamah duhsak kan hlawh loh vang pawh a ni thei bawk. Kan boxer tha tak takte hian an phu tawk hlawhtlinna an hlawhchhuah loh chang a tam, National Championship-a hlawhtlin a harsat chungchang chu thuhran ni se, kal thei an tlem a, boxer kal ve lo a tam zawk hi engtin nge an awm zel dawn? Hemi chungchangah hian ngaihtuahna kan seng ve ngai em?

Mizo boxer zingah Professional Fight luhchilh an awm chho ta zel a, professional leh amateur hi a khelh kawp theih em? 

August ni 9, 2022 khan Mizoram Boxing Association chuan thuchhuah siamin a hnuaia amateur boxer te chu an hriatpui intihsiakna ni lova tel an khap a, lo tel lui an awm a nih chuan hrem hial te pawh an tum niin a lang bawk.

Aizawl District Boxing Association leh Zonet te chuan Mizoram Fight Night an buatsaih dawn a, he amateur fight hi Mizoram Boxing Association chuan approval a pe a, chutih laiin professional fight-a tel tumte chu Amateur boxing an khelh a phalsak tawh dawn lo niin a lang.

MIZBA hi Boxing Federation of India hnuaia awm a ni a, BFI hian professional leh amateur khelh kawp hi khap chu ni selang chuan Mizoram Boxing Association-in hetia thuchhuah a siam hi a tih tur dik tak a ti kan ti thei ang.

LPS lamin Professional Fight buatsaih an tum, Amateur boxer eng emaw zatin lo khel ta se, professional record an nei dawn tihna a ni a, Amateur khelh leh kha MIZBA khan a phalsak dawn lo tihna a ni a, AIBA leh BFI ten boxer te phalna zau tak an pek laia hetia Mizoram chhunga inkhuahkhirhna dan kan lo kenkawh hi a dik ber em? 

Association Internationale de Boxe Amateur (AIBA)-in kum 2016 atang khan Professional leh Amateur khelh kawp a phal kha a ni a, Boxing Federation of India hi AIBA hnuaia awm niin BFI hnuaia boxer te pawhin professional leh amateur an khel kawp mek.

AIBA Technical and Competition rules 2019 page 37 14.2.1 14.2.1.2 ah  "Any Coach active in Profesional Boxing shall be allowed to be Coach and/or Second in AIBA competition,"  tiin a inziak kalh mai. 

BFI pawhin August ni 29, 2019-a thuchhuah (Letter/Ref No.BFI/GEN/2019-20/421 dated 29.8.2019)  a siamah chuan professional boxer te chu amateur-a an khelh a phalsak nghe nghe bawk. Mizo te pawhin professional kan luh chilh chho ta a, Lalrinsanga chu hmahruaitu niin boxer tha tak takin an chhunzawm ve ta zel a. Heng kan professional boxer tha tak tak te hian LPS leh Zonet hmalaknain nuai eng emaw zat an hnekchhuak tawh nghe nghe a ni.

Mizoram Boxing Association hian Amateur chauh approve thei pawh ni se Professional lo khel te an hnuai atanga thehchhuak kher hi thil dik ber a ni em? A chunga kan tarlan tawh ang khian BFI lamin Amateur leh Professional khelh kawptir a remtih laiin Mizoram chhunga hetia khuahkhirhna hran lo siam hi a dik dawn em ni? Hei hi zawhna chu a ni ta a ni.

Tokyo Olympic-ah khan India chuan professional boxer pahnih a tir a, tun Commonwealth Games neih zawh taka India tana Gold la tu Amit pawh khan Professional records a lo nei tawh bawk. 2016 Olympics-ah khan  boxer 3 te chu professional boxer an ni a, 2020 Olympics-ah khan professional mipa boxer 36 leh hmeichhia 7 lai an inlan a nih kha.

Professional boxer pawhin Amateur boxing an khel thei tih chu a chiang a, MIZBA Circular hnuhnung ber August ni 9, 2022-a tarlanah khan Boxing Federation of India atanga an thu hmuh anga an pawmpui loh intihsiaknaa tel te hrem an nih tur thu kan hmu a nih kha. Kha thuchhuahah khan BFI lamin Professional leh Amateur khelh kawp a phal loh avanga Mizorama professional fight-a lo inlan te a hnuchhawn dawn tih a lang chiang nghal a ni.

April ni 21, 2022-a BFI thuchhuah kha a hnuaiah hian kan tarlang a.

He thuchhuahah hian professional chungchang engmah a thai lang lo. India ramah hian Boxing Association dang an awm ve hlawm a, chung ho event a sawina niin a lang ber. Tin, heta thil chiang tak chu State Boxing Association-in a pawmpui loh chu BFI lam pawhin an pawmpui lo tihna a ni a, professional leh amateur lam ni lovin, pawmpui leh pawmpui loh lam a nih hmel zawk. Mizorama Professional fight awm tur hi MIZBA hian pawmpui lo pawh ni se boxer leh official inlan te hrem an ni tur hi a pawi em em a ni.

Mizote hi boxing ngaina kan ni a, tualchhungah pawh championship ropui tak tak kan nei thei. Amateur kawng pawh inkhel.com chuan kan support tlat a, National Championship-ah boxer zawng zawng an inlan theih si loh avangin tualchhung leh foreign thlenga boxer thenkhat chet chhuah theihna tur professional lam pawh hi kan support em em bawk.

Kan duhthusam chu professional lamah pawh, Amateur lamah pawh, kan boxer te hian inhnekna tur platform hi nei hnem se, sang takah invawrh chho se tih hi a ni. Promotional fight neih thin lai te phei kha chuan hna hmuh phah te pawh an awm nawk a nih kha. Tin, khang boxer thenkhat tuna professional luhchilh te pawh an awm nawk bawk a, infiammite tana kawng zau tak inhawng thei tur khar pin sak hi tha kan ti lo a, Mizoram Boxing Association hian Mizo infiammite hmakhua ngaihtuahin Professional fight lo khel ta boxer leh professional-a inlan official-te chungah hremna lek kher lo se tih hi kan ngenna a ni.