Mizoram Badminton League buatsaih a ni dawn

27th September 2015, 11:09PM

Mizoram Badminton Association (MBA) in Zonet TV Pvt. Ltd. nen tangkawpa Hrangbana Memorial 1st Mizoram Badminton League (MBL) a buatsaih tur chu inpuahchahna chak taka kalpui mek a ni a. Inrinni khan league a tel tur team (franchise) 5 te siam fel a ni a. He Badminton league ah hian Aizawl khawpui chhunga veng 5 - Hlimen, Mission Veng, Kulikawn, Saron Veng leh Tuikual ten Organising Board hnen a\angin team neitu nihna an lei a, tichuan hun remchang hmasa berah an player tur an lei leh dawn a ni. Player thahnem takin registration a ti fel tawh a, in ziaklut te hi team hrang hrang hian an chhang dawn a ni.

Hrangbana Memorial 1st Mizoram Badminton League ah hian Men's singles, Men's doubles, Men's Senior Doubles (35+45), Mixed doubles leh Junior boys singles ahte inelna a awm dawn a. MBL hi November thla tira khel \anin December thla tira zawhfel tura ruahman a ni.

Inrinni khan MBL khelhna hmun tura MBA in sorkar hnena a dil Rajiv Gandhi Stadium kianga Multipurpose Hall changkang tak mai, sak zawh \ep tawh, Lighting system fit mek, a chhuat la zawh fel loh deuh hlek chu Mizoram Badminton Association hruaitu thahnem takin an zu tlawh a. MBA hruaitute an phurin player te tak pawhin phurawm an ti a.

MBA thuchhuahin a tarlan danin, Lammual atanga football live a en theih a ni ta te, Table Tennis Hall atanga MHL live a en theih a ni ta se, Hawla Indoor Stadium a\anga MSL Live a en theih a ni ta te chu MBA chuan lawmawm a tiin, RG stadium kianga Multipurpose Hall a\anga MBL live a pek chhuah a ni leh thei tur hi an lawmzia an sawi a, infiammite tana hmunhma \ha (infrastructure) buatsaih chhoh zel a ni chu lawmawm an tihzia MBA hotute chuan an sawi a ni

Copyright © inkhel.com 2024. All rights reserved.