Mizoram badminton chuan bung thar a khai chho dawn ta, October ni 8, 2018 (Thawhtanni) tlai khan 'Badminton Initiative Mizoram' chu India badminton chief coach Pullela Gopichand chuan Aijal Club-ah a hawng.

Badminton hmasawnna tur atan hian Tata Trusts, North East Initiative Development Agency (NEIDA), Pullela Gopichand Badminton Foundation, Mizoram Badminton Association leh Mizoram State Sports Council te chu thawk hovin; vawiin tlai khan Aijal Club-ah thawhhona thuthlung an ziak.

Thawhhonna chungchang hi Tata Trusts aiawhin senior consultant Burzis Taraporevala chuan a sawifiah a, Badminton Grassroots (GRC), Regional Development Centre (RDC) leh High Altitude Training Centre (HATC) ah team thendarh a ni a.

Grassroots-ah hian a tam thei ang ber an zir theih nana Mizoram chhunga infrastructure awm ang ang hman tangkai tum niin, tunah hian grassroots centre 25-ah naupang 800 chuangin an zir mek. Nakkum lamah Centre thar 40 hawn belh tum a ni bawk.

Regional Development Centre (RDC)-ah hian grassroots tha tak hnuaiah uluk taka thil kalpui tum a ni a, chuta player tha zual chu HATC atan thlan an ni dawn a ni. Tin, High Altitude Training Centre hi Sihphirah din a ni dawn a, hei hi India player tha leh India aiawh tur player-te pawhin training an neih theihna tur khawpa tha ni tura duan leh kalpui tum a ni.

He hunah hian Sihphir Village Council president bakah thawhhona ziak MBA, MSSC, PGBA, NEIDA leh Tata Trusts mi leh sa an kim hle.