Nimin khan Hotel Floria Leikapui, Dawrpuiah Mizoram Volleyball Lovers (MVL) chuan a vawi khat nan Mizo Volleyball Award semin, Mizoram aiawha khel tawh leh Thutak Nunpuitu Team (TNT) volleyball club dintu Dr Sangthankima hnenah chawimawina an hlan a, Mizoram Volleyball Association Official Theme Song tlangzarh a ni nghal bawk.
MVL chuan ngun taka a zir chian hnuin Mizoram volleyball hmasawnna tura mi thahnemngai leh chawimawi phu nia a hriat mi panga a chhawp chhuak a, vote hmu sang ber Dr Sangthankima kutah MVA president Dr Lalmalsawma'n award a hlan a, award dawngtu bakah hian MVA president ni rei ber leh volleyball hmasawnna kawnga rahbi pawimawh tak tuktu - Pu F Lalrinpuia te, NIS volleyball coach leh Mizo zinga India team assistant coach ni thei awm chhun Pi Lalhlimpuii te, MVA president hlui leh player tha dap chhuah kawnga thawhhlawk tak - NG Lalhmingthanga (L) te, Mizo zinga India international player ni thei awm chhun Nl Vardinglianite tar chhuah an ni.
Champhaia volleyball tilartu, Mizoram player hlui leh TNT club dintu a nih bakah tunhnaia Mizoram volleyball boruak tinungtu langsar tak Dr Sangthankima chuan Mizorama volleyball a vul vanglaia MVA president Pu Hmingpuia kutah hlan ni zawk se awm a tih thu a sawi a, Champhai veng hrang hrangah volleyball khelh a nih theih nan net zarna tur ban a pu khawm thin tih sawi langin, TNT a din hnuah volleyball chu an enkawl mi ang lo leh mi pangngai pha lote tan damdawi tangkai tak a ni a, a hmangaih lo thei lo niin a sawi.
MVA president Dr Lalmalsawma chuan thu sawi bawkin, Mizoram volleyball-in hma a sawn theihna tura an theih ang anga hma latu MVL-in chawimawi phu an chawimawi chu a thlawp hle tih a sawi a, miten Mizoramah volleyball a thi hle tawh ti thin mah se hma lam eng hmuh tur a takin an tawng zel a, a nung chho leh dawn tih a chiang hle nia a hriat thu a sawi bawk. Tunhnaiah TNT hmalaknain Volleyball Khawmpui Lian neih a ni a, boruak a tinung nasa a, MVA-in phai lam team tha chah chhuakin volleyball hmasawnna rahbi a tuk belh bawk a, hun rei tak national championship-ah Mizo official koh an ni ngai tawh lo va, nikumah Mizo pahnih koh an ni, a ti. Mizoram volleyball president hian season tharah league tha leh changtlung zawk buatsaih tumin hma an la tih a sawi a, volleyball auditorium tur buaipui mek a ni, a ti bawk.
Award hlanna inkhawm hi MVL president Pu David Aizampuia'n kaihhruaiin, Mizoram Volleyball Association dintu zinga mi leh president hmasa ber Pu R Zatlaia'n MVA official them song a tlangzarh a, he theme song "Volleyball" tih hla hi Kimtea Varte phuah niin Projeck Fishtail-in an sa a, kalkhawmten music video an en ho nghal a ni. He inkhawmah hian MVL chuan national referee pahnih Lallawmzuala Parte leh J Lalramropuiate hnenah chawimawina thuziak a hlan a, inrinni khan kum 10 chuang mumal taka Mizoram volleyball inelna sang hmachhawn tawh, player hlui, hel kut tuara nunna chan ta Mizoram Police SI Zoramthara sunna an hmang nghal a, kalkhawmte ngawi rengin minute khat an ding a ni.