25 May 2015 04:31

digimalt

​Mizo Tleirawl ten India ramah ro an rel

National Sub Junior Football Championship for Girls chu May ni 24, 2015 (Pathianni) khan Barabati Stadium, Cuttack, Odisha-ah khelh zawh a ni ta a, Mizoram chuan final-ah si thum faia Haryana hnehin India ram champion an ni ta a ni.

India ram pum inelnaah Mizo Mipa te chuan sub-junior atanga senior thlengin ro an rel tawh, Hmeichhia intihsiaknaah erawh India champion kan la ni lo, a vawi khat nan Mizoram Tleirawlte chu National Sub Junior Football Championship for Girls-ah an champion ta a ni.

45 degree vela lum Odisha-ah hian Mizoram team hian harsatna an tawk nual a, heti chung hian a tawp thlengin an tang khawng ta. Final-ah hian Elizabeth Vanlalmawiin chuan goal hnih khungin, B Vanlalhriattiri chuan goal khat a khung bawk a. Elizabeth hian first half minute 30 -na leh second half 65 mins-ah te goal a khung a, B Vanlalhriattiri hian second half 60 mins-ah goal khat a khung bawk a ni.

Mizoram 3-0 Haryana

Elizabeth Vanlalmawii 30', 65', B Vanlalhriattiri 60'

Mizoram hian an champion na kawngah an khingpui te zawng zawng an hneh vek a. Group stage-ah Punjab an inlan theih loh avangin Tripura nen vawi hnih an khel a, Tripura lakah goal 15 lai an khung.

Quarter final hi league-a khelh niin, quarter final match hmasa berah a thlengtu Odisha 3-0 in an hneh a, an match hnihnaah Chandigarh 19-0 laiin an sawp. Quarter final match hnuhnung berah Bihar an hneh leh bawk. Semi final-ah 2-1 in Jarkhand an hneh leh a, final-ah Haryana chu 3-0 in an hneh ta a ni.

Mizoram manager Lalnunsanga chuan,"Record kan siam hi kan lawm a. Final-a kan game khelh dan kan duhthusam a ni. Kan game plan ang ngeiin goal hnih kan khung nghe nghe. Kan naute an phur em em a, a tir atangin kan nawr char char.

"First half-ah ringawt pawh chance kan hlah hnem kher mai. Haryana hian an player tha pakhat inhliam vangin an chhawr thei lova, an khel hleithei lo a ni ber mai. Goal khungtute hi hliam nei chunga khel ve ve an ni a, goal an khung hian kan lawm tak zet a ni.

"Odhisa Mizoten an theih tawpin min lo tan a, field sirah an lo tawngtai rual a, hnehna an lo puang bawk a. 'Lalpa chu fakin awm rawh se' an lo ti rual thup thup bawk nen, inkhelh a nuamin kan champion hi Pathian vang a ni tih kan chiang a, kan lawm tak zet zet a ni," tiin inkhel.com a hrilh.