Tun hma deuh kha chuan mizote infiamna khawvelah kha chuan Hockey leh Football hian thuk takin hmun pawimawh a chang a, tunah pawh ala chang mek zel a, hun engmaw kalta atang khan kan nundan te chuan hmasawn zelin Mizote dinhmun leh kan infiamna te pawn hma a sawn zel a, Tennis , Badminton, Basketball etc.. te pawh khel kan lo tam ve zel a. India ramah pawh sports sawi apiangin Mizote hming a ri tel zel lo thei tawh lova, tunah phei chuan Lalremsiami (Hockey), Jeremy Lalrinnunga (Weightlifting), Jeje Lalpekhlua (Football)- te bakah midang pawh chu kan langsar chho mek zel a, tunah hian Mizoram Sports Association te zinga mi Mizoram Tennis Association bihchianna leh an hnuaia Tennis player-te dinhmuh bakah India leh khawvel tennis bihchianna kan lo nei dawn a ni.

MIZORAM TENNIS ASSOCIATION

Mizo ten Tennis kan khel tan hi Kum 1970 chho ah khan Bawrhsap hoin anlo khel tan a, Ni 11.10.1972 ah Mizorama ahmasa ber niturin Aizawl Tennis court chu siam alo ni ta a, players te an phurin an lawm hle a, he Court hi Ni 11.11.1972 ah Pu R.Thangliana chuan ahawng a, Aizawl Tennis court hawnna ah hian Exhibition match khelh niin heta inkhel te hi:

Lalzuia/H.K Bawichhuaka Vs Bawlliana/B. Lalnithanga te anni.

Court thar a awm atangin Mizoram Tennis chuan hmalam pan zelin Mizoram a Tennis Tournament hmasa ber ni turin 1975 khan 1st Lt. Governor Trophy chu khelh a ni a,

Mizoram Tennis Association chu 6th October 1976 alo piang a:

President Hmasa ber: Pu Ch.Saprawnga

Hon. Secy hmasa ber: P.Rohmingthanga

Kum 1981 alo inherchhuan meuh chuan Mizorama Tennis tournament upa ber ni turin 1st Lalzuia Open chu khelh tan niin, tun thlenga kumtin Kumtawp lama khelh thin ani a, Mizo te Grand Slam ti te pawhin an sawi thin ani.

Mizoram ah Tennis players te pun belh zelin Mizoram pawna fehchhuah hmasak berna ni turin Kum 1982 Feb ah Guwahati tour neih niin hetah hian P.Lalnithanga, Dr Sangluaia,Chunga,Pahnianga,Phunchunga leh Lenhnuna te an kal ani.

Kum 1987 alo ni a, Hmasawnna lian tak alo thleng leh a Mizoram ah ngei zan eng hnuaia inkhelh theih turin Aizawl Tennis Court ah Floodlight vuah niin Mizoram Tennis Association bakah Tennis Players te a chawk phurin an lawm hle ani.

Hun lo kal zelin Khaw hrang hrangah Tennis Association/Club te ding zelin Kum-1994 alo inherchhuah meuh chuan Aizawl khaw pawna tournament 1st Tuichangral Open chu Dec 7th-14th ah khel ani leh a.

23rd April 1993 alo inherchhuah meuh chuan MIZORAM Tennis sawi apianga a khaw hming sawi tel loh theihloh Ngopa Tennis Club chu alo piang a, tun thlengin Tennis Players tha tak tak an chher chhuak zel a, Mizoram Tennis Powerhouse ti te pawhin an sawi thin ani.

Kum 1995 May ni-6 ah Mizoram Lawn Tennis Association chu Mizoram Tennis Association tih a thlak niin tun thlengin a la pu ta zel ani.Kum 1999 ah All India Tennis Association hnuai ah Registration tih fel ani a, Mizote tan pawh hma hun a en phah hle ani.

Kum 2000 alo inher chhuah chuan nasa takin hmasawnna pawh a kal ve zel a, naupang zawk te coaching programme te buatsaih sakin naupang te khel an pung ve zel a, Tournament atam thei ang berin buatsaih zelin Age group te tel ve zelin heng bakah hian Ladies te pawh players neih belh zelin players tha tak tak an in chher chhuak ve zel ani.

Mizo Tennis sawi apianga sawi hmaih theihloh tur Basil L Khuma hi ani a, India Junior U-12,14,16,18 a no.1 nithei khawpa thiamna neisang ani a, Kum-2010 ah khan Nick Bollettieri chuan a thiamna leh theihna te hmu in a Academy a awm turin a thlan zingah a tel ve hlauh a, Mizoram tennis history-ah phei chuan heia aia thil lawmawm hi a la awm awm lo e,e Tennis Academy-ah hian mi nazawng tan a zir theih loh a, Academy dintu Nick Bollettieri leh a hoten uluk taka a inkhel lai an lo en hnuah, court chhung leh pawn lama a hawiher chitin an enthla leh vek a, chumi hnuah chuan tennis zirtir zui tlak a ni tiin Basil-a chu an thlang ta a ni.

Nick Bollettieri Tennis Academy hi khawvela tennis academy tha bera ngaih a ni a, he hmun hi tennis player ropui tak tak, Grand Slam a champion tawh, heng Andre Agassi, Boris Becker, Pete Sampras, Martina Hingis, Venus Williams, Serena Williams, Mary Pierce, Monica Seles, Maria Sharapova etc. leh Russian nula no nalh tak mai Anna Kournikova teho inzir chhuahna hmun ani.

Kum-2015 alo inher chhuah chuan Wild-card hmanga French Open U-18 khel tur thlanna India ramah a Champion a, hemi hnu hian French ah Brazil leh China a champion te nen inkhel kual lehin Vanduai thlak takin Chinese Chengze Lyu lakah a chaklo ta hlauh mai a, heti chung pawh hian amah aia thleng thui hi Mizo ah anla awm chuang awm love.

Basila hian ATP Singles Ranking a a tawnsan lai ber chu 14 September 2015 ah khan Ranking no. 1629 ani pha hial a, Beiseina Sang tak nen mizo Tennis chuan an thlir laiin inhliam in a tlakbuak ta hlauh a, hemi hnu hian khel leh zelin inhliam neuh neuh avangin hmalam pan hleithei rih lovin Aizawlah ala awm a, Amah ala naupanga a thiamna leh theihna enin sang tak invawrh thleng thei tur chu ala ni.

Mizo Tennis kan sawi hian Mizoram pawnah pawh hnuhma kan nei tha hle a, Mizo tlangval Joseph Z Khuma ngei pawhin Delhi Vai ngalsang ho karah K-12 Tennis Academy a nei thei a, hetianga academy anei thei hi mizo tan chuan hmasawnna lian tak anilo theilo ani.

Mizo Tennis chuan hmalam pan zelin, Northeast Tournament ah te pawh Mizo Tlangval te vawi duailo anlo Champion tawh ani.

Kum-2018 alo inherchhuaka Mizo Tennis ah hmasawnna lian tak alo thleng a, India rama State thenkhat te chauhin an tih theih zinga mi, 1st Aijal Club Challenger Tennis league chu buatsaihin Mizoram leilung ngei ah India rama Tennis players tha tak tak anlo chhuak chho a, He League Hmasa berah hian Pu CS Laldawngliana Team Zarkawt Xenons te chu an Champion ani.

Coaching lamah pawh hmasawnna nei zelin Kulikawn Tlangval Calvin Lalremsiama chuan kum 2018 ah khan Diploma in Sports Coaching (NIS), chu a zo a mizo zinga ahmasa ber ani.

Catch Them Young Policy te apply zelin mizo naupang players tha tak tak te rawn inher chhuak zelin, Kum 2019 ah Khelo India Youth Games Pune, Maharashtra a neih ah Mizo Naupang JH Lalhruaizela chu Wild-card entry pek niin January ni 14-19 2019 ah an khel a, hemi ringawt pawh hi hmasawnna lian tak ani.

Referee lamah hmasawna nei lehin Lalruattluanga Tuivamit tlangval chuan May 5&6 ah National Referee Lawn Tennis chu Pune ah tha takin a pass chhuak ve leh ani.

2nd Aijal Club Challenger Tennis league pawh 25-30th Nov 2019 ah nei lehin, a kum hmasa lam aiin Players lokal pawh an tha a, India No.9 in men's singles te bakah India tana Vawitam lo fehchhuak tawh leh Wimbledon leh Davis Cup a india ai lo aah tawh Vishnu Vardhan te chah chhuakin ,hmeichhe lamah pawh India no.2 nilai mek te an chah chhuak hlawm a , MIZORAM ngeia an khel han hmuh chu Mizo tan chuan hmasawnna leh inzirna tur tam tak an chhar phah ani. 2nd Aijal Club Challenger Tennis league ah hian Joseph Z Khuma club K-12 Tennis Acers te Champion in Champion lai mek anni.

Mizoramah hmun hrang hrangah te Tennis Court tha tak tak neih belh zel ani a hetiangin Mizorama Tennis court neihna hmun :

Tun Dinhmun a Mizorama Tennis Court neih dan:

1. Aizawl Tennis Court-Aizawl

2.Ramhlun Tennis Court

3. Forest Planning School, Bethlehem Vengthlang

4.K-12 Tennis Academy- Courts

5.Tennis Club Zotlang

6.P&E Complex, Tuivamit

7.Zaua Memorial Tennis Center: AP Tlang Lunglei-2 Courts

8.Electrict Veng Court-Lunglei

9.Zobawk Tennis Court-Lunglei

10.PWD Complex-Khawzawl

11.P&E Complex-Khawzawl

12.Kolasib DTA Court

13.Leisekawt Tennis Court-Serchhip

14.P&E Complex-Bûkpui

15.Thenzawl TA Court:2 Courts

16.Saiha DTA Court

17.Tlabung TC Court

18.Saitual College Court

19.Lungsen TC Court

20.Reiek TC Court

21.Chhuanthar TC-Baktawng

22.Thenhlum TC

23.Bunghmun TC

24.Lungdai TC

25.Hnahthial DTA Court

26.Zobawk TC-Lunglei

27.Champhai DTA

28.Ngopa TC Court: 2 courts

29.Kawrtethawveng TC

30.Mamit TC

Heng zinga a tam zawk hi chu hard court pangngai kan tih ang hi a ni.

Tun Dinhmun ah Mizoram Tennis Association Ranking ah hmeichhia ah HT Lalengmawii Thenzawl Tennis Association chu no.1 ni mekin ani hian Career Titles vawi-38 zet nomawi a chawi tawh a mah aia chawi hnem anla awmlo ani.

Mipa lamah chuan Ngopa Tlangval Lalhmachhuana chu no.1 nilai ani a, K.Lalrinawma P&E chu nomawi chawi hnem ber niin Career titles vawi-35 zet nomawi a chawi ve tawh bawk ani.

Tun dinhmuna Mizoram Tennis Association hruaitu te chu heng mite hi an ni:

President :Chalrosanga Ralte 9862321891

Vice President-te:

Joseph H. Lalramsanga

Lalfakzuala Hmar

Dr. Vanlaltanpuia

Hon. Secretary: Dr. M Sarmah

Joint Secretary-te:

Rex Zarzoliana Vanchhawng

Stephen Lalhriatpuia

Dr. Andrew Sailo

Treasurer: Lalliankima

Mizoten Tennis kan hmuhdan leh anihna diktak hi hriat atha a, Tennis khel tur hian mihausa leh neinung nih kher angailo a, Tennis thiam ni tur chuan taihmak leh dawhtheihna neih a pawimawh em em a.Tunah hian AITA hnuai ah mizo coach eng emaw zat chhuak tawhin coaching programme buatsaih reng ani a, khel ve chak leh mahni fate khel duh an awm chuan khel ve turin engtik lai pawhin kan insawm rengin kan in welcome reng ani.

All India Tennis Association

Aita tia kan sawi mai thin All India Tennis Association (AITA) hi India Tennis intelkhawmna lian ber ani a,Kum 1920 ah din niin International Tennis Federation and Asian Tennis Federation ah ten affiliation annei bawk ani.

Tun dinhmunah India Men's Single's rankin chhuakthar berah Sumit Nagal chu no.1 niin Hmeichhe lamah Ankita Raina chu no.1 ani ve mek bawk ani. India Tennis sawi apianga ahming dai tawh ngailo tur chu Lander Paes hi ani a, ani hian Grand Slam Titles vawi-17 lai a chawi tawh a, heng zinga vawi-7 hi Men's Doubles ami niin adang Vawi-8 hi Mixed Doubles ami ani bawk ani.

Indian zinga inkawpfuh ber te zinga an ngaih Lander Peas&Mahesh Bhupathi te chuan 1999 khawvelin Tennis Tournament ropui bera an ngaih ah men's doubles ah anlo Champion tawh bawk ani.

-Tlana Ralte