Mizo Rider pahnih Spain-ah kal dawn

26th September 2018, 06:09PM

Spain-a Red Bull Rookie Cup tlan turin Mizo rider pahnih an inbuatsaih mek a, September ni 26, 2018 (Nilaini) khan Visa buaipui turin MiMSA hruaitute nen New Delhi an pan.

2017 khan Mizo rider Lalhruaizela chu India aiawh Rookie Cup tlan tura thlan a ni a, visa a hmuh theih loh avangin a kal lova, kuminah pawh FIA, FMSCI bakah JK Tyre leh Red Bull-ten an kalna tur an buaipui a, heti chung hian an dilna hnawlsak an ni a, mahse dil nawn lehin kal ngei an tumruh hle.

Tun tuma Spain kal tura thlante hi Jerome Vanlalrengpuia, Lawngtlai leh PC Andy Lalhmangaihsanga, Rulchawm khuate an ni a, September ni 1 leh ni 2 khan Coimbatore-a Kari Motor Speedway-ah JK Tyre FMSCI National Racing Championship neih a ni a, round hnih intihsiakna atangin Jerome Vanlalrengpuia a champion a, PC Andy Lalhmangaihsanga chu pahnihna a ni. An pahnih hian Spain-ah India aiawha intlansiak turin FMSCI chuan a thlang ta a ni.

September ni 26, Nilaini chawhma dar 11:00 khan an pualin Mizoram State Sports Council chuan hun an hmang a, lawmpuina thil pek hlanin an kal zelna turah duhsakna an hlan.

He hun hmanpuitu Pu Rosangliana, Administrative Officer chuan, " Bike intlansiak hi a hautak em em a, science thiamna sang tak leh technical thil a ni. Khalh ringawt piah lamah taksa leh rilru hrisel, huaisenna leh thiamna sang tak neih ngai a ni a, sang zawk thleng tur chuan natural talent piah lamah zir belh tur a tam hle a, Aizawla bike changkang leh tha pui pui neite zinga mi ni lo, thingtlang leh hmun hla zawk atanga loka lte India ram champion an ni thei leh, khawvel ram danga inelna tura India ai an awh thei tur hi a ropui ka ti takzet a ni" ati.

MiMSA president Vanlalmuana pawhin thu sawiin, " Kan rider te hi an intluktlang em em mai a, Andy leh Jerome te hi an point hmuh zat a in ang a, qualifying-a a tlan that zawk avangin Jerome Vanlalrengpuia a champion ta a ni. Andy-a pahnihna a ni a, an pahnih hian Spain kal tura thlan an ni. Pathumna pawh Mizo rider tho a ni a, round one thununtu Zothanmawia a vanduai hle a, practice-naah inhliamin a malpui ruh a tliak hlauh mai a, round 2 inelna a tel zui thei ta lo a ni. Heti chung hian a pumpuiah pathumna a ni thei tho a ni" a ti.

MiMSA president chuan," Kum 2013 khan Thenzawl tlangval Lalrindika chu India ram champion niin Sentul, Indonesia-a ASEAN Cup-ah India aiawh mi panga tlan zingah a tel tawh a, Jerome Vanlalrengpuia leh PC Andy Lalhmangaihsanga ten India aiawha khawvel huap inelna sang zawk an tlan leh thei tur hi kan chhuang hle a ni. Suzuki Gixxer Cup-ah Malsawmdawngliana Kanan veng chuan beiseina sang tak a nei mek a, Gixxer Cup hi tum li tlan a ni dawn a, a vawi thumna thleng Kari Motor Speedway, Coimbatore-ah neih a ni ang a, a tawpna erawh Buddh International Circuit, Noida-ah tlan a ni ang. Mizo rider kan neih that ber pakhat Malsawmdawngliana hi 1000 cc leh 600cc super bike intlaksiakah tel tumin a inbuatsaih mek a ni" a ti bawk.

(adsbygoogle = window.adsbygoogle || []).push({});
Copyright © inkhel.com 2024. All rights reserved.