Mizo rawlthar duhawm tak, India aiawh pawha lo feh chhuak tawh Lalchhanhima Sailo chanchin hi tlem han tar lang ila a tha awm e. India ram tana vawi tam tak feh chhuak thei tur khawpa beiseiawm a ni.
Kum 17-a upa Lalchhanhima Sailo hian a kum a la tlem ngaihtuahin tawn hriat a nei tha angreng hle a. India U16 ah te pawh a lo tel tawh a, tunah chuan Indian Arrows ah a awm mek a, bul tantuah te pawh a tang ve tan tawh a ni.
Lalchhanhima Sailo hi midfielder niin, India U16 team chu 2018 AFC U16 Championship ah khan quarter final a thlenpui thei a. Khatih lai khan kum 15 mi chauh a la ni a, quarter final an thlen theihna kawngah player pawimawh tak a ni thei tho a ni.
Luka Modric ngaisangtu Chhanhima hian Mizo footballer dang, Shylo Malsawmtluanga, Lalrindika Ralte, Lallianzuala Chhangte, Jeje Lalpekhlua leh Jerry Lalrinzuala te zinkawng lo zawh tawh chu a zawh tan ve dawn mek a, dinhmun sang taka din theih tumin tan a la chho ve dawn a ni.
Football khawvelah chuti takin Chhanhima hi a mikhual lo a tih theih a, a pa chu police niin, Mizoram Police Department-ah a thawk a, Mizoram State Police team-ah te pawh a lo khel ve tawh thin a ni.
Chhanhima Sailo hian Mizo footballer zingah chuan India rama football club lar ber pawl East Bengal captain ni thei Lalrindika Ralte chu a ngaisang ber a. A inkhel a en thin avanga a hnung zui ve duh te pawh a nih theihna lai a awm a ni.
“Ka chhungte hi min fuihtu leh min thlawptu berte an ni a, professional footballer ni thei tur hian nasa takin min kaihruai a. Lalrindika Ralte hi hman atanga ka ngaihsan ber niin, kan khelhna position pawh a inang a, ka entawn nasa thei hle,” tiin Chhanhima chuan a sawi.
“A remchang a nih phawt chuan Lalrindika Ralte inkhel hi en hram hram ka tum thin a. TV atangin a ni emaw, an inkhelhna hmunah a ni emaw, hman lohna ka nei a nih lem loh chuan en hram hram hi ka tum zel a ni,” a ti bawk.
Aizawl khawpuia sei lian Lalchhanhima hian la naupang tak chungin Chandigarh Football Academy (CFA) a zawm a, hetah hian a intuai hriam chho a, a hnuah Minerva Punjab ni thin, I-League club Punjab FC ni ta hi a zawm a, youth team lamah hun a hmang chho a ni.
Minerva Punjab U15 team chu Nike Premier Cup ah a champion pui a, hei hi miin an hriat chhoh tanna pawimawh tak a ni ber a. National team scout te mit fukna niin, India U16 a tel turin an lo thlang nghal a ni.
“Kum 7 ka nih atangin football hi ka khel tan a, Aizawl chhuahsanin Chandigarh ka pan a, Chandigarh Football Academy ka zawm a. He mi hnuah hian Minerva ka zawm leh a, Mumbai khawpuia Nike Premier Cup ah U15 team chu kan champion a. Scout te chuan India U16 zawm turin min thlang a, AFC U16 Championship ah ka khel zui ve ta a ni,” tiin Lalchhanhima chuan a sawi.
Zinkawng pangngai a zawh chhoh tan hnu hian hnung lam a hawi leh tawh rih lo a. Kum 16 a nih laiin India U19 team ah te pawh a khel tawh nghe nghe a, tuna a hmabak chu India senior team lama luh chhoh a ni ber tawh mai.
“Chona lian tak ka hmachhawn chho zel dawn a, ka la naupang a, hmasawnna tur tam tak ka la nei bawk a. Theihtawp ka chhuah chho zel ang a, player tha tak tak ka hmachhawn zel dawn a, heng hi keima intuai hriamna atan hman tangkai zel ka tum ang,” a ti.
Lalchhanhima Sailo chuan, “Inkhelh hma hian ka tawngtai ngei ngei a, hetianga ka tawngtai hian chakna min pe thin,” tiin a sawi.