January ni 6, 2016 khan AR Lammualah German Students National Football Team leh Mizoram XI an inhmachhawn a, he match hian Mizoram Team chu 3-1 in tlawm mahse Germany coach Marcus Jung chuan Mizo player ten talent an neih that thu inkhelh banah a sawi.
"Mizoram tean-ah player talent nei tha tak tak ka hmu. Tactic tha tak tak hmangin min bei a, keini tan pawh game awlai a ni hauh lo mai. Chutih laiin chak erawh kan phu zawk a ni," tiin German Team Head coach Marcus chuan a sawi.
German midfielder Nico Schneck pawhin inkhelh nuam an tin thu leh mipui tam tak an punkhawm avanga an hlim thu a sawi a. Hetih lai hian Mizo footballer-ten technique tha zawk an neih theih min duhsak pui a, hote nia kan ngaih hnai te te passing pawh uluk zawka ti turin a fuih bawk a ni.
Technical Advisor Arunava Chaudhuri chuan,"2014-a Hoffenheim ka rawn kalpui khan kan lawm hle a, khami tum ai khan tun tum hi nuam kan ti zawk niin ka hria. " tiin a sawi a. Hma kan sawn zel a beisei thu sawi a sawi chhunzawm nghal a,"Mizoram hian grass root tha takin in nei tawh a, heng hi kum 10 hnuah chuan inhlawhtlinna turte an la ni dawn a ni. Hmanhmawh lo ang che u," tiin.
Inkhelh tan tira Mizoram Team khel tha lo chu Arunava Chaudhuri chuan a hrethiam khawp a,"Indian player-te hian foreigner kan hmachhawn hian kan zam mai thin a. Chutiang chu vawiin pawh khan Mizoram Team-ah kan hmu, mahse a hnuah erawh inkhel tha tawlh tawlh ta a ni," tiin a sawi.
Mizoram Team manager Pu Lalbiakzuala chuan,"Inbuatsaihna hun kan duhthusamin kan nei thei lova, reilote chhung player lakkhawmte kan practice a ni a. Tin, game kan la khel mang lo bawk nen, vawiina 3-1 a kan chaklo pawh hi result chhiaah kan ngai lo, kan lawm zawk khawp a ni," tiin a sawi.